ანასტასია შატალოვას საქმეზე ბრალდებულების ადვოკატები აცხადებენ, რომ სასამართლოს გადაწყვეტილებას აღკვეთის ღონისძიების სახით პატიმრობის შეფარდებაზე სააპელაციო სასამართლოში გაასაჩივრებენ.

"სასამართლოს გადაწყვეტილებას პატიმრობის შესახებ მივიჩნევთ უკანონოდ და აუცილებლად იქნება გასაჩივრებული თბილისის სააპელაციო სასამართლოს საგამოძიებო კოლეგიაში დადგენილ ვადებში. ეს გადაწყვეტილება არის უკანონო და ალბათ, დარწმუნდებიან, მათ შორის, მედიასაშუალებების წარმომადგენლებიც, საზოგადოებაც, რომ ჩემი დაცვის ქვეშ მყოფი არის უკანონო პატიმარი.

არცერთი მტკიცებულება საქმეში არ არის, რომელიც დასაბუთებული ვარაუდის სტანდარტს დააკმაყოფილებს. ეს ადამიანი ბრალის სამივე ნაწილში არის სრულიად უკანონოდ დაკავებული, უკანონო პატიმარი და ხელების შეწმენდა უნდათ ბექა ლატარიაზე. ესაა მოცემულობა", — აცხადებს ბექა ლატარიას ადვოკატი, გიორგი ლაღიძე.

ლევან რაჯავის ადვოკატის განცხადებით, სასამართლოს არც ფაქტობრივი და არც ფორმალური საფუძვლები არ ჰქონია მისი დაცვის ქვეშ მყოფის დაპატიმრებისთვის.

"არც ფაქტობრივი და არც ფორმალური საფუძვლები არ ჰქონდა სასამართლოს დღეს ლევან რაჯავის დაპატიმრებისა. გადაწყვეტილება არის უკანონო, დაუსაბუთებელი და ჩვენ აუცილებლად გავასაჩივრებთ სააპელაციო სასამართლოში. რაც შეეხება ბრალის ფაბულასა და ფორმულირებას, პროკურატურამ ვერანაირად ვერ შეძლო ლევან რაჯავი დაეკავშირებინა ამ დანაშაულთან, შეუთითხნეს ბრალი და სამარცხვინოა, რომ ", — აცხადებს გელა ჩივაძე.

ბიძია ხასიას ადვოკატი, მუხრან ღუწკაია ამბობს, რომ საქმეში არცერთი პირდაპირი მტკიცებულება არ არის რომელიც ხასიას ბრალეულობას დაადასტურებდა.

"რა თქმა უნდა, სასამართლომ მიიღო აბსოლუტურად დაუსაბუთებელი და უკანონო გადაწყვეტილება, ჩვენ ამ გადაწყვეტილებას გავასაჩივრებთ სააპელაციო სასამართლოში აუცილებლად.

საქმეში მართლაც არ არის არცერთი პირდაპირი მტკიცებულება, რომელიც დაადასტურებდა ჩემი დაცვის ქვეშ მყოფის ბრალეულობის საკითხს და არცერთ ბრალდებულთან მიმართებით არ არსებობს მტკიცებულება", — თქვა ადვოკატმა.

ანასტასია შატალოვას მკვლელობის საქმეზე ბრალდებულ სამივე პირს, ბექა ლატარიას, ბიძინა ხასიასა და ლევან რაჯავს სასამართლომ აღკვეთის ღონისძიების სახით წინასწარი პატიმრობა შეუფარდა.

თბილისში მომხდარი მკვლელობის ფაქტზე 19 ოქტომბერს სამი ადამიანი დააკავეს. პოლიციელებმა დაკავებულების საცხოვრებელი სახლების ჩხრეკისას დიდი ოდენობით ნარკოტიკული საშუალება და ხელყუმბარები ამოიღეს.

გამოძიება საქართველოს სისხლის სამართლის კოდექსის 108-ე, 19-353 პრიმა, 353-ე, 236-ე, 260-ე და 375-ე მუხლებით მიმდინარეობს.

გაიგე მეტი: