პარლამენტის პლენარულ სხდომაზე პოლიტიკური განცხადებების გაკეთებდის დროს ოპოზიციონერმა დეპუტატმა, სალომე სამადაშვილმა ქართული ოცნების დეპუტატებს მიმართა, თუ ვის ასრულებენ ისინი, როცა აცხადებენ, რომ ნაციონალურ მოძრაობას დაასრულებენ. სამადაშვილის თქმით, ის, რაც ქვეყანაში ხდება აისბერგის წვერია და ძალიან სწრაფად, მთელი ქვეყანა კრახისკენ მიექანება.

"ვის ასრულებთ ბატონებო და ქალბატონებო, ამ ქვეყნის ნახევარ მილიონ მოქალაქეს? მათ ეუბნებით, რომ არსებობის უფლება არ აქვთ და ბოროტება რომ დასრულდეს ამ ქვეყანაში, ისინი უნდა დასრულდნენ? ამას ეუბნებით იმ ათი ათასობით ადამიანს, რომელიც ქუჩაში გამოვიდა რამდენიმე დღის წინ და გეუბნებათ, რომ უსამართლო თამაშის წესებს არ მიიღებენ. ამას ეუბნებით კიდევ ერთხელ საერთაშორისო თანამეგობრობას, რომელიც გეუბნებათ, რომ ქვეყანა, სადაც ქვეყნის ყოფილი პრეზიდენტი საპატიმროშია და მის სიცოცხლეს საფრთხე ემუქრება სამართლიან სასამართლოს იმსახურებს", — განაცხადა სამადაშვილმა.

პარლამენტის პლენარულ სხდომაზე ის ინიციატივით წარსდგა, რომ მიხეილ სააკაშვილის საქმეზე ახალი სასამართლოს გადაწყვეტილებამდე მისი მსჯავრის მოხდის პროცესი გადავადდეს. სამადაშვილის თქმით, სააკაშვილი მისი თანამონაწილეობის გარეშე გასამართლდა და ევროპული კონვენცია მოქალაქის თავის სასამართლო პროცესზე დასწრების უფლებას ითვალისწინებს.

დეპუტატის თქმით, პარლამენტმა, ასევე, უახლოეს მომავალში ახალ საკანონმდებლო ცვლილებებზეც უნდა იმსჯელოს, რომელიც ყოფილი მაღალი თანამდებობის პირების წინააღმდეგ სამართლებრივი დევნის დაწყებას ეხება.