პარლამენტის წევრის, სალომე სამადაშვილის განცხადებით, ნაციონალურ მოძრაობას არ აქვს საკმარისი მხარდაჭერა იმისთვის, რომ ქვეყნის მართვის სადავეები დამოუკიდებლად გადაიბაროს და ამიტომ, კოალიციური მართვა არის ქვეყნის გარდაუვალი მომავალი.

"ნათელი არის სურათი, მიუხედავად იმისა, რომ გეთანხმებით, სააკაშვილის დაბრუნებამ ქვეყანაში გარკვეულწილად ეს ორპოლუსიანობა გააღრმავა, მობილიზება გაუკეთა რა ნაციონალური მოძრაობის მხარდამჭერებს. ამავე დროს ვხედავთ, თუნდაც ასეთ ვითარებაში ნაციონალურ მოძრაობას არ აქვს საკმარისი მხარდაჭერა, რომ დამოუკიდებლად გადაიბაროს ამ ქვეყნის მართვის სადავეები. ამიტომ კოალიციური მართვა, ეს არის გარდაუვალი მომავალი ამ ქვეყნის", — თქვა სამადაშვილმა პირველი არხის ეთერში.

მიხეილ სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა ექიმმა, ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.