ქართული ოცნების დეპუტატი დავით სერგეენკო აცხადებს, რომ გუშინ, 14 ოქტომბერს მიხეილ სააკაშვილის მხარდასაჭერად გამართულ აქციაზე ბევრი ადამიანი იყო მისული, თუმცა დასძენს, რომ 2012 წლის ქართული ოცნების ორგანიზებულ აქციას ვერც კი შეადარებს. სერგეენკოს თქმით, მასშტაბები განსხვავებული იყო.

"ეს პრეცედენტული იყო, გავდა თუ არა 2012 წლის აქციებს თავისი რაოდენობით. გუშინდელ აქციაზე ბევრი ადამიანი იყო მისული, მაგრამ 2012 წელს ვერც კი შევადარებ. 2012 წელი კარგად მახსოვს, მე თვითონაც ვმონაწილეობდი ამ აქციებში და მასშტაბები განსხვავებული იყო. არ მინდა, რომ რაღაც დაკნინებად ჩამითვალოს ვინმემ, მაგრამ ვამბობ იმას, რასაც ვფიქრობ", — განაცხადა სერგეენკომ.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა. აქციის მიმდინარეობისას ინტერნეტის ხარვეზზე საუბრობდა მთავარი არხის გენერალური დირექტორი, ნიკა გვარამიაც. ის ამბობდა, რომ აქციაზე "ყველაფრის დახშობა დაიწყეს".

სააკაშვილის მხარდამჭერ აქციაზე ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.