ქართული ოცნების დეპუტატი, რატი იონათამიშვილი გუშინ, 14 ოქტომბერს თავისუფლების მოედანზე გამართულ აქციას კერპთაყვანისმცემლობას უწოდებს და ამბობს, რომ ამის ყურება "ძალიან უხერხული იყო". მისივე განცხადებით, მიხეილ სააკაშვილის გათავისუფლების მოთხოვნა ძალადობისა და წამების პროპაგანდაა.

"21-ე საუკუნეში კერპთაყვანისმცემლობის ყურება ძალიან უხერხულია. ერთადერთი, რაზეც გავლენას მოახდენს ეს აქცია, არის ის, რომ ნაციონალური მოძრაობის რეიტინგმა კიდევ უფრო დაიწია. [...] მიხეილ სააკაშვილის გათავისუფლების მოთხოვნა ამავდროულად არის პროპაგანდა ძალადობისა და წამების", — განაცხადა იონათამიშვილმა.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა, სადაც ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა ექიმმა, ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.