პარლამენტის წევრის, სალომე სამადაშვილის განცხადებით, ექსპრეზიდენტის, მიხეილ სააკაშვილის მხარდამჭერმა აქციამ აჩვენა, რომ ხალხი "მზად არის ცვლილებებისთვის". მისი თქმით, აქციაზე ამდენი ადამიანი გასული 5 წლის განმავლობაში არ უნახავს.

"მე საერთოდ, არ მიყვარს თავების თვლა, მაგრამ თავების თვლა უყვარს ამ ხელისუფლებას. ჩვენ გვახსოვს მათი დაცინვით ტონში საუბარი, რომ რამდენიმე ათასი ადამიანი შეიკრიბება. მე შემიძლია, გითხრათ, რომ 2016 წელს, რაც დავბრუნდი საქართველოში, იმის მერე ყველა აქციაზე ვყოფილვარ — დიდზე, საშუალოზე, პატარაზე და ამდენი რაოდენობით ადამიანი მე ერთად შეკრებილი, გასული 5 წლის განმავლობაში არ მინახავს. ამიტომ, ეს თავისთავად აჩვენებს იმას, რომ ხალხს უნდა ცვლილება", — თქვა სამადაშვილმა TV პირველის ეთერში.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა. აქციის მიმდინარეობისას ინტერნეტის ხარვეზზე საუბრობდა მთავრი არხის გენერალური დირექტორი, ნიკა გვარამიაც. ის ამბობდა, რომ აქციაზე "ყველაფრის დახშობა დაიწყეს".

სააკაშვილის მხარდამჭერ აქციაზე დღეს ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.

სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.