DC Comics-ის მიერ გამოშვებულ ახალ კომიქსებში თანამედროვე სუპერმენი, ჯონათან კენტი, ბისექსუალია. სუპერგმირი, რომელსაც აქამდე როგორც ჰეტეროსექსუალს, ისე ვიცნობდით, ახალ კომიქსში ბიჭ მეგობართან რომანტიკულ ურთიერთობას დაიწყებს.

"კლარკ კენტის კიდევ ერთი თეთრკანიანი ჰეტეროსექსუალით შეცვლა ხელიდან გაშვებულ შესაძლებლობას ჰგავდა", — ამბობს სცენარისტი ტომ ტეილორი New York Times-თან მიცემულ ინტერვიუში. ჯონათანის ახალი სასიყვარულო ინტერესის ობიექტი რეპორტიორი ჯეი ნაკამურაა, რომელიც ყველას გადარჩენის მცდელობით მენტალურად და ფიზიკურად გადაღლილ სუპერმენზე ზრუნავს.

კენტის სექსუალური ორიენტაცია ერთადერთი სიახლე არ არის, რომლითაც სუპერგმირი აუდიტორიის წინაშე წარდგება. ბოლოდროინდელი მოვლენებიდან გამომდინარე, სუპერმენი აპროტესტებს ლტოლვილთა დეპორტაციას, ცდილობს სკოლებში გახშირებული მკვლელობებს ხელი შეუშალოს და შეაჩეროს ის ხანძრები, რომლებიც კლიმატის კრიზისს იწვევს.

"სუპერმენი ყოველთვის იმედის, ჭეშმარიტებისა და სამართლიანობის სიმბოლო იყო. დღეს ეს სიმბოლო კიდევ უფრო მეტს რამეს წარმოადგენს. დღეს უფრო მეტ ადამიანს შეუძლია საკუთარი თავი კომიქსების ყველაზე ძლიერ სუპერგმირში დაინახოს", — დასძინა ტეილორმა.

უნდა აღინიშნოს, რომ კომიქსების სამყაროში ბოლო დროს ქვიარპერსონაჟები უფრო ხშირად გვხვდებიან. აგვისტოში ცნობილი გახდა, რომ რობინის ახალ ვერსიაში მას ბოიფრენდი ეყოლება. ხოლო მარტში Marvel-მა გადაწყვიტა, რომ კაპიტან ამერიკის მოსასხამი გეი პერსონაჟისთვის გადაეცა.