მესამე პრეზიდენტის, მიხეილ სააკაშვილის ადვოკატის, ბექა ბასილაიას განცხადებით, შიმშილობის გამო ექსპრეზიდენტს გადაადგილება და მეტყველება უჭირს. ბასილაიას თქმით, სააკაშვილის მხნედ არის, მაგრამ, შიმშილობა მის ჯანმრთელობაზე ნეგატიურად აისახება.

"შიმშილობა უკვე შედის ძალიან რთულ ფაზაში და ამის შედეგებს უკვე თვალნათლივ ვხედავთ. გადაადგილებასთან დაკავშირებით უკვე არის პრობლემები. ასევე, მისი განცხადებით, ფეხები დაუსივდა მიშას. როდესაც ის საუბრობს, მისი საუბრის მოტორიკა, მისი მოძრაობა მისი გადაადგილება უკვე მკაფიოს და ნათელს ხდის, რომ შიმშილობის ნეგატიური შედეგები სახეზეა.

მიშა არის ძალიან მხნედ, მაგრამ, ჩვენ უნდა გვესმოდეს, რომ ეს შიმშილობა ჯანმრთელობის მდგომარეობის გაუარესებას უფრო და უფრო მეტად გამოიწვევს და უფრო და უფრო მეტად გამოიწვევს. დღეს უკვე პრობლემების წინაშეა", — განაცხადა ბექა ბასილაიამ რუსთავის ციხეში, სააკაშვილთან შეხვედრის შემდეგ.

ბასილაია ამბობს, რომ მნიშვნელოვანია ექსპრეზიდენტის პირად ექიმს, ნიკოლოზ ყიფშიძეს მისი მონახულების საშუალება მიეცეს. სააკაშვილის კიდევ ერთი ადვოკატის, გიორგი გელხაურის თქმით, ყოფილი პრეზიდენტი ოთხოვს, მის პირად ექიმს ყოველდღე ჰქონდეს მისი მონახულების საშუალება.

ადვოკატებმა რუსთავის ციხიდან მიხეილ სააკაშვილის კიდევ ერთი წერილი გამოიტანეს, სადაც ექსპრეზიდენტი საუბრობს 14 ოქტომბერს დაგეგმილ აქციასა და არჩევნების მეორე ტურზე. სააკაშვილი, ასევე, წერს, რომ ჯანმრთელობის მდგომარეობის გაუარესების მიუხედავად, არ აპირებს შიმშილობის შეწყვეტას.

მიხეილ სააკაშვილი 12 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.