შინაგან საქმეთა სამინისტროს განცხადებით, ლანჩხუთში ერთიანი ნაციონალური მოძრაობის წევრსა და მის ცოლზე ძალადობის ბრალდებით 1983 წელს დაბადებული პირი დააკავეს.

"გამოძიებით დადგინდა, რომ არაფხიზელ მდგომარეობაში მყოფმა ბრალდებულმა მიმდინარე წლის 10 ოქტომბერს, ლანჩხუთში, თავის თანაკლასელს, პარტია ერთიანი ნაციონალური მოძრაობის ლანჩხუთის ორგანიზაციის აღმასრულებელ მდივანს — გ.ც.-სა და მის მეუღლეს — ი.ზ.-ს, მათსავე საცხოვრებელ სახლში სიტყვიერი და ფიზიკური შეურაცხყოფა მიაყენა", — ვკითხულობთ შსს-ს განცხადებაში.

გამოძიება საქართველოს სისხლის სამართლის კოდექსის 126-ე მუხლის 1-ლი პრიმა ნაწილის გ ქვეპუნქტით მიმდინარეობს. დანაშაული 2 წლამდე ვადით თავისუფლების აღკვეთას ითვალისწინებს.