აზერბაიჯანის საგარეო საქმეთა სამინისტრო ბათუმში კორპუსის ჩამონგრევას ეხმაურება და დაღუპულთა ოჯახებს უსამძიმრებს. განცხადება სამინისტროს ტვიტერის გვერდზე გამოქვეყნდა.

"ქალაქ ბათუმში, შვიდსართულიანი შენობის ჩამონგრევის ამბავმა ძალიან დაგვამწუხრა. ვუსამძიმრებთ ინციდენტის შედეგად დაღუპულთა ოჯახებს და სწრაფ გამოჯანმრთელებას ვუსურვებთ ყველა დაშავებულს. გამოვხატავთ სოლიდარობას მეგობრული საქართველოს მიმართ", — ნათქვამია უწყების განცხადებაში.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, ნანგრევებში ერთ ადამიანს ეძებენ. რამდენიმე საათის წინ ნანგრევებიდან კიდევ ორი ადამიანის — ქალისა და 12 წლამდე მოზარდის ცხედარი იპოვეს.

ამ დროისათვის ნაპოვნია 7 ცხედარი — 3 ბავშვი, 1 ასაკოვანი, 1 შუა ხნის ასაკის ქალი და 2 კაცი. სამაშველო და სამძებრო ღონისძიებები 24 საათზე მეტია გრძელდება.