კლინიკა მედცენტრის მთავარი ექიმი ჯემალ გელაშვილი ამბობს, რომ ნანგრევებიდან ამოყვანილი კაცის მდგომარეობა მძიმეა, მაგრამ კონტროლირებადი. ექიმის თქმით, პაციენტს წუხელ მთელი რიგი ლაბორატორიული ანალიზები და სპეციალისტების კონსულტაციები ჩაუტარდა. წინასწარი დიაგნოზირების შედეგად გამოვლინდა: სუნთქვის მწვავე უკმარისობა, ხანგრძლივი ზეწოლის სინდრომი, დაუზუსტებელი შოკი. ექიმის ინფორმაციით, პაცინეტს, ასევე, აღენიშნება მარცხენა წვივის მოტეხილობა, მარჯვენა ზედა კიდურის დაჟეჟილობა და მთელ სხეულზე მრავლობითი ექსკორიაციები.

"პაციენტის მდგომარეობა ამ ეტაპისთის რჩება მძიმე, ღამის განმავლობაში რჩებოდა მძიმე, თუმც აკონტროლირებადია სიტუაცია ამ ეტაპისთვის. ამ დიაგნოზებით პაციენტი რეანიმაციულ განყოფილებში აგრძელებს მკურნალობას. მდგომარეობა არის მძიმე, საყურადღებო. დაგეგმილია კიდევ მთელი რიგი კვლევები. პაციენტი მართვით სუნთქვაზე რჩება. შემოყვანის შემდეგ მდგომარეობა არ გართულებულა.

პაციენტი შემოსვლისას იყო კონტაქტური, თუმცა იყო ადინამური, ზოგადი საერთო სისუტე იყო გამოხატული. ამ ეტაპისთვის ის იმყოფება დამცველობითი სამკურნალო ნარკოზის ქვეშ, ამიტომ ის კონტაქტური არ არის", — ამბობს ექიმი.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. მაშველებმა ადგილიდან ორი ადამიანი ცოცხალი გამოიყვანეს. გარდა ამისა, დღის განმავლობაში ნანგრევების ქვეშ მოყოლილი მანქანიდან ამოიყვანეს წლის და 3 თვის ბავშვი. ის საავადმყოფოდან უკვე გაწერეს.

ნაპოვნია 5 ცხედარი — 2 ბავშვი, 1 ასაკოვანი ქალი და 2 კაცი. სამაშველო და სამძებრო ღონისძიებები თითქმის 23 საათია გრძელდება.