საპარლამენტო უმრავლესობის დეპუტატის გედევან ფოფხაძის თქმით, ქართულმა ოცნებამ მოაგებინა გიორგი მარგველაშვილს არჩევნები, შედეგად კი, მიიღეს პრეზიდენტი, რომელიც ლექციებს უკითხავთ. ამის შესახებ, მან დღეს, პარლამენტში ფარული მიყურადების შესახებ კანონზე პრეზიდენტის შენიშნვნების განხილვისას განაცხადა.

მისივე თქმით, გიორგი მარგველაშვილი ოპოზიციის პრეზიდენტი ხდება და არა ქართველი ხალხის:

"ჩვენი გუნდის გარეშე მეეჭვება მას ეს არჩევნები მოეგო, მაგრამ მან ეს მანდატი ქართველი ხალხის და ქართული ოცნების საზიანოდ მოაბრუნა. ჩვენ შეგვიძლია ამისათვის საზოგადოებას ბოდიშიც მოვუხადოთ, მაგრამ ის რომ პრეზიდენტის ინსტიტუტი იქცეს აღმშენებლობის შემაფერხებლად, დაუშვებელია. მას აქედან მკვეთრად უნდა გაეცეს პასუხი, რომ პარლამენტი ამის გაკეთებას არ აპირებს. რამდენი ვეტოც არ უნდა იყოს მიღებული, თუ ეს ვეტო ემსახურება პოლიტიკურ თამაშებს და ვიღაცის პოლიტიკური ინტერესების ლობირებას, პარლამეტმა მკვეთრად უნდა გასცეს მას პასუხი. ჩვენთვის ასეთი პრეზიდენტი მიღებელია".

1 მარტს მესამე მოსმენით, 87 ხმით 2-ის წინააღმდეგ მიიღო კანონი. ცვლილებების მიხედვით, სახელმწიფო უსაფრთხოების სამსახურის მმართველობის სფეროში შეიქმნება საჯარო სამართლის იურიდიული პირი - საქართვლოს ოპერატიულ-ტექნიკური სააგენტო.

პრეზიდენტი გამოყოფს ორ ფუნდამენტურ პრობლემას აღნიშნულ კანონში და ესენია:

  • პირველი, ეს არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი და შესაბამისად, ეწინააღმდეგება ამ საკითხზე საკონსტიტუციო სასამართლოს გადაწყვეტილებას.
  • მეორე ეს არის კანონპროექტში გაუმართლებელი და არაპროგნოზირებადი ხარჯები, რომელსაც ეს კანონპროექტი აკისრებს საკომუნიკაციო კომპანიებს.

პრეზიდენტის შეთავაზებაა პარლამენტთან, რომ სააგენტოს დამოუკიდებლობის დასაცავად, დაუქვემდებაროს ის საქართველოს პრემიერმინისტრს, როგორც ესაა სახელმწიდო დაცვისა და დაზვერვის სამსახურის შემთხვევაში.