"რა მხუთავი აირი? ოსვენციმის საკონცენტრაციო ბანაკში ვართ?" — ასე ეხმიანება ახალგაზრდა იურისტთა ასოციაციის თავმჯდომარე, ნიკა სიმონიშვილი პრემიერმინისტრის განცხადებას, სააკაშვილის დაანონსებული აქციის შემთხვევაში "მხუთავი აირით" დაშლის შესახებ.

"ღარიბაშვილი რომ დანიშნა ოცნებამ პრემიერად, მაშინვე ცხადი იყო, რომ ხელისუფლება რადიკალიზაციის გზას დაადგა, 5 ივლისის შემდეგ რომ ძალიან საშიში გახდა, ესეც ვნახეთ ყველამ და ეს რა უბედურებაა?

პს. ახლა არ დამიწყოთ, ცრემლსადენი გაზი უნდა დაეწერაო. იურისტობა არ სჭირდება ცრემლსადენი გაზის და მხუთავი აირის გარჩევას", — წერს ის.

ამ თემას გამოეხმაურა, იურისტი, გიორგი მშვენიერაძეც და თქვა, რომ "რეგვენმა ღარიბაშვილმა" იმდენიც არ იცის, მხუთავ აირსა და ცრემლსადენ გაზს შორის რა განსხვავებაა.

"აღარაფერს ვამბობ ათას სიშლეგესა და პრიმიტივიზმზე, რაც მის "ნააზრევში" გამოსჭვივის", — წერს მშვენიერაძე.

დღეს, 6 ოქტომბერს პრემიერმინისტრმა, ირაკლი ღარიბაშვილმა ვრცელი პოსტი გამოაქვეყნა, სადაც ამტკიცებდა, რომ სააკაშვილი საქართველოში ხელისუფლების გადატრიალების მყარი იმედით ჩამოვიდა, თუმცა მისი "რევოლუციური განზრახვა" ყველა შემთხვევაში წარუმატებლობისთვის იყო განწირული, რადგან 3 ოქტომბერს მოულოდნელადაც რომ გამოჩენილიყო რუსთაველზე, პოლიცია "წყლის ჭავლის ან მაქსიმუმ მხუთავი აირის გამოყენებით" დაშლიდა შეკრებას, სააკაშვილს კი დააკავებდა.

პოსტში ღარიბაშვილი ავითარებს სხვადასხვა აზრს, განიხილავს ჭორსა და თეორიას იმაზე, თუ რატომ ჩამოვიდა ექსპრეზიდენტი ქვეყანაში. ვერსიებს შორის პრემიერს ნარკოტიკებზე დამოკიდებულებაც აქვს ისე, რომ ბრალდებების გასამყარებლად არა ფაქტები, არამედ საკუთარი მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ამ თემაზე ირონიულად საუბარი აძლიერებს სტიგმას და დისკრიმინაციულია.