პრემიერმინისტრი ირაკლი ღარიბაშვილი ირწმუნება, რომ ექსპრეზიდენტ მიხეილ სააკაშვილის საქართველოში შემოსვლის შესახებ ინფორმაცია ჰქონდათ.

"მინდა, ზოგადად, მოსახლეობას ვუთხრა, თუ რა დიდ პროვოკაციას, ანტისახელმწიფოებრივ პროვოკაციას გეგმავდა ყოფილი პრეზიდენტი, სამარცხვინო კაცი, სააკაშვილი. ე.ი. მათი პრიმიტიული გათვლებით, მათ ეგონათ, რომ ჩვენ, ესე იგი... როგორ წარმოიდგინეს, როგორ დაიჯერეს ამ, უკაცრავად და ბრიყვებმა, რომ ჩვენ, შესაძლოა, რაღაც არ გვცოდნოდა მისი [მიხეილ სააკაშვილის] გადაადგილების შესახებ?" — თქვა ღარიბაშვილმა იმედის ეთერში.

27 სექტემბერს ექსპრეზიდენტმა სააკაშვილმა ფეისბუქზე გამოაქვეყნა ბილეთების ფოტო, რომლის მიხედვითაც ქვეყანაში 2 ოქტომბერს, ხმის მიცემის პროცედურის დასრულების შემდეგ უნდა დაბრუნებულიყო. მმართველ გუნდში ამბობდნენ, რომ ის სიტყვას ისევ უღალატებდა და ჩამოსვლას ვერ გაბედავდა, მაგრამ თუ მაინც გაბედავდა, აეროპორტშივე დააკავებდნენ. თუმცა, არჩევნების წინა დღეს, პირველ ოქტომბერს, სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას.

სანამ სააკაშვილი მხარდამჭერებს მობილიზაციისკენ მოუწოდებდა, ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. იმავეს ამბობდა შინაგან საქმეთა სამინისტროც და ამტკიცებდა, რომ მას არც უკრაინის და არც საქართველოს საზღვრები არ გადაუკვეთავს. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. მოგვიანებით, იმედის ეთერში პრემიერმინისტრი ამტკიცებდა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება.

გაიგე მეტი: