რუსთავში 88 უბნიდან დათვლილია 57, ანუ 64,77% და როგორც ცნობილია, მეორე ტური გაიმართება. აღსანიშნავია, რომ მონაცემების განახლებასთან ერთად სიტუაცია იცვლება და ხან ენმ-ს მერობის კანდიდატი ლიდერობს, ხან ქართული ოცნების.

ამჟამად, მმართველი გუნდის კანდიდატი ენმ-ს 0,76%-ით უსწრებს. შედეგები ასე გადანაწილდა:

  • ქართული ოცნება: ნინო ლაცაბიძე — 44,67;
  • ნაციონალური მოძრაობა: დავით კირკიტაძე — 43,91.

ცენტრალური საარჩევნო კომისიის პირველადი მონაცემებით, რამდენიმე ქალაქში მეორე ტური იქნება. ხმების ნაწილი უკვე დათვლილია და გარკვეულ ადგილებზე ოპოზიციური პარტიების კანდიდატები ლიდერობენ. გარდა ამისა, რამდენიმე თვითმართველ თემში უბნების 100% დათვალეს. ყველა ასეთ თემში დიდი სხვაობით ქართული ოცნების კანდიდატები ლიდერობენ.

ცესკომ პირველადი შედეგების გამოქვეყნება დაგვიანებით დაიწყო. თავმჯდომარის, გიორგი კალანდარიშვილის განცხადებით, ამის მიზეზი ისაა, რომ სურდათ, წინასწარ მონაცემებს აესახა "მაქსიმალურად პროპორციული ხმათა რაოდენობა, რისი შესაძლებლობაც ამ დრომდე ბოლომდე არ იყო".

"მაღალი პასუხისმგებლობიდან გამომდინარე, ჩვენ გვსურდა, რომ წინასწარის წინა მონაცემები ყოფილიყო რეპრეზენტატიული და ველოდებოდით შემაჯამებელ ოქმებს, რომელიც გარკვეულწილად უზრუნველყოფდა ამ პროპორციების დაცვას. [...] აქედან გამომდინარე, ჩვენ დაველოდეთ მაქსიმალურად ყველა საარჩევნო ოლქიდან გარკვეული რაოდენობის შემაჯამებელი ოქმების შემოსვლას, ზუსტად იმიტომ, რომ შესაბამისი პროპორციების თანაბრად დაცულობის უზრუნველყოფა შესაძლებელი ყოფილიყო, რომელიც საზოგადოებას, განსაკუთრებით საერთო პროპორციულ ნაწილში გარკვეული სურათის და აღქმის შესაძლებლობას მისცემდა", — განაცხადა გიორგი კალანდარიშვილმა.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.