საარჩევნო უბნების დახურვიდან 10 საათი გავიდა, თუმცა ცენტრალურ საარჩევნო კომისიას პირველადი შედეგები არ გამოუქვეყნებია. საარჩევნო ადმინისტრაციის ვებ-გვერდზე ამ დროისთვის ატვირთულია შემაჯამებელი ოქმების მხოლოდ მცირე ნაწილი.

აღსანიშნავია, რომ უბნების დახურვის შემდეგ, ცესკოს პრესსპიკერმა თქვა, რომ პირველადი შედეგების გამოქვეყნებამდე "ოპტიმალური დრო" დაახლოებთ 7-8 საათი იქნება. ნათია იოსელიანის განმარტებით, სხვა საერთო არჩევნებისგან განსხვავებით, საარჩევნო პროცედურები მეტ დროს მოითხოვს.

"ამასთან, 2014 და 2017 წლებში ჩატარებული არჩევნებისას პირველადი მონაცემების გამოქვეყნების სტატისტიკა და ზოგადად, გასული წლების გამოცდილება აჩვენებს, მუნიციპალიტეტის არჩევნებისას, პირველადი წინასწარი მონაცემების გამოსაქვეყნებლად ოპტიმალური დრო საარჩევნო უბნების დახურვიდან 7-8 საათია", — განაცხადა იოსელიანმა.

პირველადი შედეგები უკვე გამოაქვეყნა სირცხვილიას მიერ დაფუძნებულმა სამოქალაქო საარჩენო კომისიამ, რომლის მიხედვით დიდ ქალაქებში მეორე ტურები იქნება, ამასთან, რამდენიმე ქალაქში ოპოზიციის კანდიდატი ლიდერობს.

დღეს, 20:00 საათის შემდეგ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს. რაც შეეხება პარტიულ რეიტინგებს, Edison Research-ის მიხედვით, ქართული ოცნება 43%-იან ბარიერს ლახავს და 46% აქვს, ხოლო IPSOS-ის (მხოლოდ თბილისი) თანახმად, მმართველ გუნდის შედეგი 38%-ია, GORBI კი ამბობს, რომ ქართულ ოცნებას 47,6%-იანი მხარდაჭერა აქვს.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.