პრემიერმინისტრი ირაკლი ღარიბაშვილი მოგვიწოდებს, პატივი ვცეთ სახელმწიფო უსაფრთხოების სამსახურის თანამშრომლებს. ასე უპასუხა მან სუს-ის მიერ, სავარაუდოდ, უკანონო მოსმენებთან დაკავშირებულ კითხვას.

"მე მინდა ყველას მოგიწოდოთ, რომ როცა საქმე ეხება ისეთ მნიშვნელოვან ინსტიტუტს, როგორიც არის სახელმწიფო უსაფრთხოების სამსახური და ის თანამშრომლები, რომლებიც 24 საათის განმავლობაში ემსახურებიან ჩვენს ქვეყანას და ჩვენი მოსახლეობის უსაფრთხოებას, მათ სიმშვიდეს, პატივი უნდა ვცეთ და მადლობა უნდა გადავუხადოთ მათ",— განაცხადა ირაკლი ღარიბაშვილმა.

გავრცელებული ფაილების გამო სუს-ის უფროსის პასუხისმგებლობის შესახებ დასმულ კითხვას ღარიბაშვილმა თავი აარიდა და თქვა, რომ ლილუაშვილი ღირსეული ხელმძღვანელია.

"მე მინდა გითხრათ, რომ ჩვენ გვყავს ძალიან ღირსეული სახელმწიფო უსაფრთხოების სამსახურის ხელმძღვანელი, ბატონი გრიგოლ ლილუაშვილი", — განაცხადა ღარიბაშვილმა.

"მე რა შუაში ვარ?" — ასე უპასუხა გრიგოლ ლილუაშვილმა სავარაუდოდ სუს-დან გავრცელებული ფაილების გამო მისი გამოკითხვის შესახებ დასმულ კითხვას. რაც შეეხება მისი პასუხისმგებლობის დაყენებისა და თანამდებობის დატოვების მოთხოვნას, ლილუაშვილმა განაცხადა, რომ "ოპოზიციის ჭკუაზე ვერ ივლის".


13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგე მეტი: