ქართული ოცნება 28 სექტემბერს მთავარი არხის მიერ გავრცელებულ ინფორმაციას ეხმაურება და ამბობს, რომ ტელევიზიის ეთერში გასული სლაიდები ფეიკია და ამგვარი სლაიდები ქართულ ოცნებაში არც უცხოელი და არც ქართველი პიარ-კონსულტანტების მიერ არასდროს მომზადებულა.

"გუშინ "ნაციონალური მოძრაობის" კუთვნილი ერთ-ერთი პარტიული ტელევიზიის ეთერში გავიდა გადაცემა, სადაც განხილულ იქნა თითქოსდა ისრაელელი კონსულტანტების მიერ მომზადებული პიარ-სტრატეგია.

გადაცემის მთავარი მიზანი ნაციონალური მოძრაობის სატელიტი პოლიტიკოსის, გიორგი გახარიას რეპუტაციის გადარჩენა და მის შესახებ გავრცელებული კონკრეტული ინფორმაციის წინასწარ მომზადებულ დეზინფორმაციად წარმოჩენა იყო", — აცხადებენ პარტიაში.

ქართულ ოცნებაში ამბობენ, რომ ნაციონალური მოძრაობის, "მისი სატელიტებისა და პარტიული ტელევიზიების ე.წ. სარედაქციო პოლიტიკის" მიმართ მათი დამოკიდებულების გაჟღერებას არავითარი პიარ-სტრატეგია არ სჭირდება.

"ჩვენ თავს ვალდებულად ვთლით, საზოგადოებას ვუთხრათ სიმართლე, დეზინფორმაციის, სიცრუისა და სიძულვილის ტირაჟირება კი, ნაციონალური მოძრაობის კუთვნილი პარტიული ტელევიზიების ხელწერაა.

მოვუწოდებთ ნაციონალურ მოძრაობას და მის ტელევიზიებს, ნაკლები ენერგია დახარჯონ სიცრუის ფუჭ ტირაჟირებაზე და მოემზადონ გარდაუვალი მარცხისთვის, ისევე, როგორც წინა შვიდ შემთხვევაში, 2 ოქტომბერსაც სიცრუეზე სიმართლე გაიმარჯვებს!", — ამბობენ ისინი.

მთავარმა არხმა 28 სექტემბერს გაავრცელა ინფორმაცია ებრაელი პოლიტტექნოლოგის, მოშე კლუგჰაფტისა და ქართული ოცნების კონტრაქტის შესახებ, რომლის მიხედვითაც 2021 წლის თვითმმართველობის არჩევნებში გასამარჯვებლად რამდენიმე მიზანია გაწერილი. მთავარი არხის მიერ გამოქვეყნებულ მასალებში წერია, რომ ამ მიზნებში აღნიშნულია ოპოზიციური არხების, ცალკეული ჟურნალისტების დისკრედიტაცია და ასევე, ყოფილი პრემიერმინისტრის, გიორგი გახარიას წინააღმდეგ "კარგად დაგეგმილი და ღრმად დახვეწილი სტრატეგიის" დაგეგმვის საჭიროება. დოკუმენტში, ასევე, აღნიშნულია, რომ გახარიას წინააღმდეგ ერთ-ერთ სტრატეგიად ნარკოტიკის მოხმარებასთან დაკავშირებული ნარატივის შექმნა განიხილებოდა.