თბილისის მერის მოადგილემ, ირაკლი ლექვინაძემ მცირე მეწარმეებს საქმიანობის სავაჭრო ობიექტებზე გაგრძელება შესთავაზა. ამის შესახებ ინფორმაციას თბილისის მერია ავრცელებს.

უწყების ცნობით, თბილისის მერიასა და ბაზრობების ასოციაციას შორის მიღწეული შეთანხმების შედეგად, მოვაჭრეებს შესაძლებლობა აქვთ, აირჩიონ ადგილი სასურველ სავაჭრო ობიექტზე, გაიარონ რეგისტრაცია და დაიწყონ საქმიანობა.

ირაკლი ლექვინაძის თქმით, მოვაჭრეები დაახლოებით ექვსი თვის განმავლობაში, გათავისუფლდებიან საიჯარო გადასახადისაგან და ორგანიზებულ სავაჭრო სივრცეებში ექნებათ საშუალება განახორციელონ თავიანთი საქმიანობა.

თბილისის მერიამ გარე ვაჭრობის წინააღმდეგ ღონისძიებების გატარება 19 მარტს, მეტრო მარჯანიშვილის მიმდებარე ტერიტორიიდან დაიწყო. მათი განცხადებით, ქმედება კანონსაწინააღმდეგოა და იქმნება ისეთი პრობლემები, როგორიცაა შეფერხება გადაადგილებისას, უსაფრთხოების ნორმების დაცვის ხელშეშლა, ანტისანიტარია, მალფუჭებადი პროდუქტის შენახვის პირობების დაუცველობა, გაურკვეველი წარმოების პროდუქციის გაყიდვა, ქალაქში არსებული ტურისტული ზონებისა და თბილისის იერსახის დამახინჯება.

მერიაში აცხადებენ იმასაც, რომ ანალოგიური ღონისძიებები, უახლოეს მომავალში, დედაქალაქის მასშტაბით არსებულ სხვა ადგილებშიც განხორციელდება.