ექსპრემიერ გიორგი გახარიას პარტიამ საქართველოსთვის პროკურატურას განცხადებით მიმართა. საუბარია ქართული ოცნების მიერ პარტიის თავმჯდომარისთვის, გიორგი გახარიასთვის წაყენებულ ნარკოდამოკიდებულებასთან დაკავშირებულ ბრალდებაზე.

პარტიის პოლიტსაბჭოს წევრის, ანა ბუჩუკურის თქმით, ისინი სწრაფ და ეფექტურ გამოძებას ითხოვენ და პირველ რიგში, უნდა დაიკითხოს ირაკლი კობახიძე, რომელმაც გახარია "კოკაიშნიკად" მოიხსენია.

"ბოლო პერიოდის განმავლობაში ნარკოტიკებთან დაკავშირებით, რომელიც არის დანაშაული, ჩვენ ვისმენთ განსაკუთრებით ირაკლი კობახიძის მხრიდან ბრალდებებს, ჩვენი გუნდის ლიდერისა და ჩვენი გუნდის მისამართით, შესაბამისად, რა თქმა უნდა, როგორც პასუხისმგებლიანმა პარტიამ შევიტანეთ განცხადება პროკურატურაში და ვითხოვთ სწრაფ, ეფექტიან და გამჭირვალე გამოძიების ჩატარებას.

პირველ რიგში, რა თქმა უნდა, უნდა დაიკითხოს ირაკლი კობახიძე და დანაშაულის დაუდასტურებლობის შემთხვევაში მისი პასუხისმგებლობის საკითხი დგება ცრუ დასმენაზე", — აცხადებს ბუჩუკური.

ნარკოტესტი პირველად ქართული ოცნების მერობის კანდიდატმა, კახა კალაძემ ჩაიტარა, ეს ჯანსაღი ცხოვრების პოპულარიზაციით ახსნა და სხვა კანდიდატებსაც იგივე მოუწოდა. მოწოდების საპასუხოდ, გახარიამ განაცხადა, რომ ოპონენტებმა მასთან დებატებზე პირისპირ დაჯდომის შიშით "ბანკებით" სირბილი დაიწყეს. 10 სექტემბერს მან, ასევე, განაცხადა, რომ ახლო მომავალში ნარკოტესტთან დაკავშირებით "საინტერესო ინფორმაციას" გაამხელდა.

16 სექტემბერს ირაკლი კობახიძემ გიორგი გახარიას "კოკაიშნიკი" უწოდა. თავად გახარიამ 17 სექტემბერს განაცხადა, რომ ვენის ჰოსპიტალში ჩატარებული ექსპერტიზის შედეგად, ნარკოტიკული ნივთიერების მოხმარება არ დაუდასტურდა.

21 სექტემბერს თბილისის მოქმედმა მერმა და მერობის კანდიდატმა კახა კალაძემ მერობის კანდიტატების დებატებისას ყოფილ თანაგუნდელ გიორგი გახარიაზე თქვა, რომ მისთვის ნარკომანობა არავის დაუბრალებია.

კობახიძემ 24 სექტემბერს განაცხადა, რომ ნარკოტიკი გახარიას პირველად ქალმა გაასინჯა, რამდენიმე ხანში კი კობახიძემ აღნიშნა, რომ ის გახარიას პარტიის წევრია და თბილისის საკრებულოს სიაშია. მის ამ განცხადებას გახარიას პარტიის წევრი ქალების გამოხმაურება მოჰყვა, რომელმაც კამპანიური სახე მიიღო. "ის ქალი მე ვარ", — წერდნენ ფეისბუქგვერდზე ყოფილი პრემიერმინისტრის გუნდის წევრები.

გაიგე მეტი: