ექსპრემიერი, გიორგი გახარია ამბობს, რომ 2019 წლის 20 ივნისს, ე.წ გავრილოვის ღამეს, ცრემლსადენის გაზის გამოყენების ნებართვა თავად გასცა. ხოლო, კითხვაზე, იგივე გააკეთა თუ არა რეზინის ტყვიების გამოყენების შემთხვევაში, გახარია პასუხობს, რომ მასზე ბრაძანების გაცემა საჭირო არ არის და "თავდაცვის მიზნით გამოიყენეს".

"ცრემლსადენი გაზის გამოყენებასთან დაკავშირებით, როდის უნდა დაწყებულიყო რა ღონისძიება, ეს ბრძანება მე გავეცი, რა თქმა უნდა. რეზინის ტყვიებზე გაცემა არ სჭირდებოდა, რეზინის ტყვიები თავდაცვის მინიზთ გამოიყენეს კონკრეტულმა [პირებმა]", — ამბობს ის ფორმულას ეთერში.

კითხვაზე, რატომ ესროდნენ პოლიციელები ჟურნალისტებს დამიზნებით, გახარია თავდაპირველად ირწმუნება, რომ იარაღს დამიზნების ფუნქცია არ ჰქონდა. თუმცა, ჟურნალისტის რეპლიკაზე, რომ პირდაპირ დაინახა, თუ როგორ ესროდნენ მის კოლეგას, გახარია ამბობს, რომ "ეს იყო ცუდი" და ამ "გადაცდომებზე" გამოძიება მიმდინარეობს.

"ახლა თქვენ რასაც აკეთებთ, ეს არის კეთილსინდისიერ პოლიციელებზე თავდასხმა. ინსტრუქცია წააიკითხეთ ჟურნალისტი რომ ხართ. ამ ტყვიის დამიზნებით სროლა არ შეიძლება, შეუძლებელია. ეს აირაღი დამიზნებით ვერ ისვრის, სხვა ფუნქცია აქვს, იშლება", — განაცხადა მან.

ჟურნალისტის კითხვაზე, თვა თუ არა მან, რომ დროა დაიწყოს მიტინგის დაშლა და გასცა თუ არა ბრძანება, ის პასუხობს: "რა თქმა უნდა". აღსანიშნავია, რომ აქამდე ამ კითხვის პასუხად, გახარია ამბობდა, რომ რაც მოხდა მისი პასუხისმგებლობაა და ბრძანების გაცემაზე არ საუბრობდა.

გახარია ამტკიცებს იმასაც, რომ 20 ივნისის ღამეს მას ოპოზიციის ლიდერებთან არ უსაუბრია და პარლამენტში შეხვედრაზე არ დაუბარებია.

"ჩვენ ყველაფერს ვაპირებდით იმისთვის, რომ გველაპარაკა ნებისმიერ მხარესთან, რომ იქ ტემპერატურა დაწეულიყო. არავინ დამიბარებია, რას ნიშნავს ოპოზიციის ლიდერები დავიბარე?" — განაცხადა მან.

ამავე ეთერში მან ისაუბრა იმაზეც, რომ მართლმადიდებლობის საერთაშორისო ასამბლეის გამართვა შეცდომა იყო და მაშინ მის დაქვემდებარებაში მყოფმა უწყებამ, შსს-მ, მმართველი გუნდი გააფრთხილა, რომ სერგეი გავრილოვის ქვეყანაში შემოშვება რისკებს შეიცავდა. გახარიას მტკიცებით, ეს პოზიცია უწყებამ მკვეთრად გამოხატა.

ყოფილი შინგან საქმეთა მინისტრი არ პასუხობს კითხვას, ამის ფონზე, ვინ მიიღო რუსი კომუნისტი დეპუტატის შემოშვების გადაწყვეტილება.