პრინცესა დაიანას შესახებ გადაღებული ახალი ფილმი სპენსერი (Spencer) წლის ერთ-ერთი ყველაზე მაღალი მოლოდინების მქონე პროექტია, რომელიც დიდი ბრიტანეთის სამეფო ოჯახის ერთ-ერთი ყველაზე ტრაგიკული ბედის მქონე წევრს უკეთ გაგვაცნობს.

აგვისტოში გამოქვეყნებული ამ ფილმის პირველი ტრეილერი საკმარისი აღმოჩნდა მაყურებლების დასაინტრიგებლად, რომ ლედის დის როლში კრისტენ სტიუარტი მოულოდნელ სამსახიობო გარდასახვას გვპირდება, თუმცა სულ ცოტა ხნის წინ გამოქვეყნებული ახალი და სრული ტრეილერი კიდევ უფრო მასშტაბური და შთამბეჭდავი სანახაობისთვის გვამზადებს:

სპენსერი ჩილელმა რეჟისორმა პაბლო ლარაინმა გადაიღო, რომელსაც მაყურებლები ყველაზე კარგად 2016 წელს გამოსული ფილმით Jackie იცნობენ: აშშ-ის პრეზიდენტ ჯონ კენედის ცოლის, ჟაკლინ კენედის როლის შესრულებით ნატალი პორტმანმა ოსკარის ნომინაცია დაიმსახურა.

მისი ახალი ფილმის სახელწოდება პრინცესა დაიანას გვარს იმეორებს და სიუჟეტიც მთლიანად ამ ტრაგიკული ისტორიული ფიგურის ირგვლივ განვითარდება: კინოსურათი ერთ უქმეებზე მომხდარ მოვლენებს აღწერს, როცა პრინცესა დაიანა თავისი ქორწინების წარუმატებლობაზე დაფიქრდება და გადაწყვეტს, რომ პრინც ჩარლზს უნდა გაშორდეს.

სპენსერის პრემიერა უკვე შედგა რამდენიმე საერთაშორისო კინოფესტივალზე, სადაც კრიტიკოსებისგან ძირითადად დადებითი შეფასებები დაიმსახურა და კრისტენ სტიუარტს მომავალი ოსკარების მთავარ კანდიდატადაც მოიაზრებენ.

"როგორ ფიქრობ, მომკლავენ?" — ამბობს ტრეილერის ბოლოს პრინცესა დაიანა და ამის შემდეგ ისღა დაგვრჩენია, ათვლა დავიწყოთ 5 ნოემბრამდე, კინოთეატრებში ფილმის გამოსვლის თარიღამდე.