დაავადებათა კონტროლის ეროვნული ცენტრი (NCDC) სარეკლამო კომპანია ალმას პასუხობს და აცხადებს, რომ NCDC-სა და ალმა-სთან 2021 წლის 7 მაისს გაფორმებულ ხელშეკრულებაში ალმას მიერ განცხადებაში მოყვანილი სამთვიანი ვადა მოხსენიებული არ არის. შესაბამისად, NCDC არ იზიარებს იმ მოსაზრებას, რომ სექტემბერში რადგან ბანერების ლოკაციის ცვლილების ან ვადის გაგრძელებაზე არ მიმართეს, სრული უფლებამოსილება ჰქონდათ, Covid-19-ის საწინააღმდეგო ვაქცინაციის მხარდამჭერ ბანერზე, თუნდაც რამდენიმე ადგილზე, პირდაპირ სხვა შინაარსის ბანერები ცენტრთან შეთანხმების გარეშე გადაეკრათ.

"მით უფრო, თავად წერთ, რომ ცოტა ხნის წინ სამ 3 სხვადასხვა ლოკაციაზე განსხვავებული შინაარსის ბანერზე შეთანხმდით, აქვე, იქნებ დაგვიკონკრეტოთ, ვისთან შეთანხმდით ამ საკითხებზე, ცენტრთან ეს არ ყოფილა შეთანხმებული. სახელშეკრულებო პრაქტიკის, საკითხის მაღალი სახელმწიფოებრივი და საზოგადოებრივი მნიშვნელობიდან გამომდინარე და ასევე, თითოეული მოქალაქის მორალური პასუხისმგებლობის გათვალისწინებით, ბანერის განთავსების ლოკაციის ცვლილება უნდა განხორციელებულიყო, მხოლოდ მხარეთა წინასწარი შეთანხმებით", — ნათქვამია NCDC-ის განცხადებაში.

მათივე თქმით, ისინი იმედს გამოთქვამენ, რომ მიუხედავად ზემოაღნიშნულისა, ცენტრსა და ალმას შორის მრავალწლიანი წარმატებული სახელშეკრულებო ურთიერთობების გათვალსწინებით, ქვეყნისთვის ამ უმნიშვნელოვანეს მომენტშიც, სოციალური და მაღალი პასუხისმგებლობის გათვალსწინებით, არსებული გაუგებრობა აღმოფხვრება და კომპანია ვაქცინაციის მხარდამჭერ ბანერებს აღადგენს.

დღეს NCDC-ის მიერ გაკეთებული განცხადების პასუხად, კომპანია ალმამ განაცხადა, რომ 2021 წლის 14 აპრილის ხელშეკრულება, რომელიც გაფორმებული იყო ალმასა და NCDC-ის შორის, მხოლოდ ბანერების (სარეკლამო ვიზუალის) დაბეჭდვასა და მათ ბილბორდებზე გაკვრას (სამონტაჟო სამუშაოების შესრულებას) ეხებოდა. ალმა ირწმუნება, რომ კონტრაქტი სარეკლამო კონსტრუქციების დაქირავების საფასურს არ ითვალისწინებდა.

მათივე განმარტებით, 2021 წლის 14 აპრილის ხელშეკრულებით გათვალისწინებული ვალდებულება ალმას მიერ ჯერ კიდევ 2021 წლის 20 აპრილისთვის სრულად იქნა შესრულებული. მათი თქმით, მიუხედავად იმისა, რომ 3 თვის გასვლის შემდეგ NCDC-ის მათთან არანაირი სახის კომუნიკაცია არ დაუმყარებია და კამპანიის გაგრძელება არ უთხოვიათ, ალმამ ვაქცინაციის მხარდაჭერის მიზნით განთავსებულ გარე სარეკლამო ბანერებსა და სარეკლამო რგოლებს მონიტორები უსასყიდლოდ შეინარჩუნა და დღემდე ინარჩუნებს.

17 სექტემბერს, თბილისში გვიან ღამით ბანერი წარწერით "არა ნაცებს, არა ბოროტებას" ისევ გამოჩნდა. Facebook-ზე გავრცელდა ფოტოც, სადაც ჩანს, რომ პოლიტიკური პლაკატი ვაქცინაციის მოწოდების ბანერს გადააკრეს. 18 სექტემბერს NCDC-მა განცხადება გაავრცელა და ვაქცინაციის მოწოდების ბანერების ჩანაცვლება დაგმო.

თავად კომპანია ალმამ დღეს განცხადება გაავრცელა, სადაც განმარტავენ, რომ ფუნქცია მხოლოდ ბილბორდების კონსტრუქციის ფართის გაყიდვა/გაქირავებაა და მათ ვიზუალზე პასუხისმგებლობას იხსნიან. თუმცა, კომპანიაში, ასევე, აცხადებენ, რომ ე.წ. "სისხლიანი" ბანერების შინაარსი მათთვის მიუღებელია. კომპანიის განცხადებაში არაფერია ნათქვამი ხელშეკრულების დარღვევაზე.

გაიგე მეტი: