ინდიანას შტატში მცხოვრები კაცი მას შემდეგ დააპატიმრეს, რაც გადაუდებელი დახმარების ხაზზე ზედიზედ რამდენჯერმე დარეკა და ოპერატორს შესჩივლა, დავიღალეო.

ამერიკული გამოცემა Newsweek-ის ინფორმაციით, 61 წლის დენიელ შროდერმა 911-ზე ოთხჯერ დარეკა, რათა თავისი მძიმე დღის შესახებ ეცნობებინა.

"კაცი ყოველი დარეკვისას აცხადებდა, რომ ის დაიღალა", — ვკითხულობთ დაპატიმრების შესახებ პოლიციის მიერ წარმოდგენილ ანგარიშში.

ეს პირველი შემთხვევა არ არის, როცა დენიელმა გადაუდებელი დახმარების ცხელი ხაზი უმართებულოდ გამოიყენა: სწორედ დაპატიმრების წინა დღით, 11 სექტემბერსაც დარეკა 911-ზე და თავისი გაბრაზება გამოხატა ნათესავების მიმართ, რომლებიც "მის ნებას არ ემორჩილებოდნენ".

სასამართლომ დენიელ შროდერს ციხეში ექვსი თვით პატიმრობა მიუსაჯა. მოსამართლემ მას ასევე სასჯელის არიდება შესთავაზა იმ პირობით, თუ ცხელ გაზზე რეალური გადაუდებელი დახმარების საჭიროების გარეშე აღარ დარეკავდა.

დენიელი სწორედ ამ პირობით გათავისუფლდა, თუმცა მეორე დღესვე დაარღვია სიტყვა და ამჯერად ციხეში 60 დღის გატარება მოუწევს.