პარტია ლელოს ერთ-ერთი ლიდერის, ლევან სამუშიას განცხადებით, ქვეყანა, შესაძლოა, სამართლებრივი კოლაფსის წინაშე აღმოჩნდეს. ასე აფასებს ის სავარაუდოდ სუს-ის საიდუმლო ფაილებს.

"შეიძლება ქვეყანა აღმოჩნდეს, ამ საქმიდან გამომდინარე, სამართლებრივი კოლაფსის წინაშე და რატომ გეტყვით: თუ ყველა ჩართულია — მოსამართლე თუ ჩართულია და დარწმუნებული ვარ, რომ ჩართულია, გამომძიებელი თუ ჩართულია, პროკურორი თუ ჩართულია, საქმე ვინ უნდა გამოიძიოს? ყველა მოწმე და დაზარალებულია. ქვეყანაში არ დარჩება არც ბრალის წარმდგენი, არც საქმეზე განაჩენის გამომტანი, იმიტომ, რომ ყველა დაზარალებულია, ყველა ბრალდებულია. წარმოიდგინეთ, რა ტოტალურ სისტემასთან გვქვს საქმე?!", — განაცხადა ლევან სამუშიამ TV პირველის ეთერში.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს. ჩანაწერების მიხედვით, უსმენენ და უთვალთვალებენ სასულიერო პირებს, ელჩებსა და საელჩოების თანამშრომლებს, არასამთავრობო ორგანიზაციების წევრებს, აქტივისტებს, პოლიტიკოსებს, ჟურნალისტებს, ძალადობრივი ჯგუფის წევრებსა და ლიდერებს და ამ ადამიანებთან კავშირში მყოფ მოქალაქეებს. ამასთან, ჩამონათვალში შეხვდებით კონკრეტული სასულიერო პირების მძღოლებს, საპატრიარქოს დაცვას, სტიქაროსნებს, თეოლოგებსა და სამების დამლაგებელსაც კი. ფაილებს შორის არის ინფორმაცია საპატრიარქოში რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც ავთენტურობას არც უარყოფს და არც ადასტურებს. უწყება აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. 14 სექტემბერს საქმეზე გამოძიება პროკურატურამ კერძო კომუნიკაციის საიდუმლოების დარღვევის მუხლით დაიწყ, 18 სექტემბერს კი დამატებით განცხადება გაავრცელა, სადაც მიუთითა, რომ გამოძიება ფარული მასალების შემდგენსა და მომპოვებლებსაც ეძებს. მათივე განცხადებით, სამართლებრივი დახმარების ფარგლებში, აშშ-სა და სხვა ქვეყნებს გამოძიებით დადგენილ სერვერებზე მონაცემების შენახვისა და გამოთხოვის მიზნით მიმართეს.

გაიგეთ მეტი: