მუსიკოსები ახალი ალბომის გამოშვებას საზოგადოებას სხვადასხვა გზით აცნობენ, თუმცა მათ შორის, ალბათ, ყველაზე მოულოდნელი რეპერი Lil Nas X-ის განცხადება აღმოჩნდა. 2 კვირის წინ რეპერმა ინსტაგრამზე ფოტო გამოაქვეყნა, რომელშიც ახალ ალბომზე "ორსულად" იყო. ფოტოთი ალბომის დებიუტიც დააანონსა — 17 სექტემბერი.

დაპირებული 17 სექტემრის დადგომა და ალბომის, სახელად Montero-ს გამოსვლა მუსიკოსმა კიდევ უფრო მოულოდნელი გზით გვაცნობა. მან ინსტაგრამზე ჯერ "მშობიარობა" დააანონსა, შემდეგ კი "მშობიარობის" პროცესს თითქმის 2-წუთიანი ვიდეო მიუძღვნა.

ვიდეოს ბოლოს მუსიკოსი "ახლადდაბადებულ" ალბომს გულში იკრავს.

"პატარა Montero აქაა! ალბომი Montero უკვე გამოვიდა", — წერს მუსიკოსი ინსტაგრამზე.

ეს პირველი შემთხვევა არაა, როცა Lil Nas X-მა საზოგადოება აალაპარაკა. მარტში მან სიმღერა Montero გამოუშვა, რომლის კლიპმა განსხვავებული რეაქციები გამოიწვია. ზოგიერთი კრიტიკოსი მუსიკოსს "მკრეხელობაში", "სატანიზმსა" და სხვა მსგავს ანტირელიგიურ ქმედებაში ადანაშაულებდა.

მუსიკოსი რამდენიმე დღის წინ საზოგადოების ყურადღების ცენტრში Met Gala-ზეც აღმოჩნდა, სადაც ის 3 კოსტიუმით წარსდგა.

ფოტო: Getty Images

ამავე თემაზე: