ქართველი მსმენელების დიდი ნაწილი ჰიპ-ჰოპის ამერიკელ შემსრულებელ Lil Nas X-ს, ალბათ, კარგად არ იცნობს, თუმცა ყველას ერთხელ მაინც ექნება მოსმენილი მისი 2019 წლის ჰიტი Old Town Road, რომელიც დიდი ხნის განმავლობაში მსოფლიო ჩარტებში ლიდერობდა.

სულ ცოტა ხნის წინ, 26 მარტს მომღერალმა ახალი ვიდეოკლიპი გამოაქვეყნა, რომელმაც მალევე უამრავი ადამიანის ყურადღება მიიქცია: YouTube-ზე ვიდეო ტრენდების სათავეში მოექცა.

თუ ჯერ არ გინახავთ რეპერის ახალ სიმღერაზე, სახელწოდებით MONTERO, გადაღებული კლიპი, ქვემოთ მოცემულ ვიდეოს უყურეთ და თავადვე მიხვდებით, რას შეიძლება გამოეწვია ეს საყოველთაო ყურადღება.

კლიპის სიუჟეტი სამოთხიდან იწყება, სადაც Lil Nas X ევას განასახიერებს, რომელიც გველმა აცდუნა, თუმცა აქ ნაჩვენები ცდუნება მეტია, ვიდრე უბრალოდ აკრძალული ხილის გასინჯვა...

ფოტო: Giphy

ამის შემდეგ მოქმედება ბერძნულ / რომაულ მითოლოგიაში გადაინაცვლებს, სადაც მომღერალი თითქოს სამსჯავროზე წარდგება.

ფოტო: Giphy

ბოლოს კი, როცა მომღერალი სამოთხეში მიდის, მოულოდნელად სტრიპტიზის ბოძი გამოჩნდება და ისიც ჰაეროვან ღრუბლებში ფარფატს მცხუნვარე ჯოჯოხეთში ჩასრიალებას ამჯობინებს, სადაც, არც მეტი, არც ნაკლები, ეშმაკს უცეკვებს სტრიპტიზს.

ფოტო: Giphy

ცხადია, ამ ყველაფერს მსმენელთა და მაყურებლის ნაწილი კრიტიკულად შეხვდა: განსაკუთრებით კონსერვატიულად განწყობილებმა Lil Nas X "მკრეხელობაში", "სატანიზმსა" და სხვა მსგავს ანტირელიგიურ ქმედებაში დაადანაშაულეს.

მსგავსი შეფასებების ნაწილს რეპერი პირადადაც გამოეხმაურა. მაგალითად, ტვიტერზე ერთ-ერთ მომხმარებელს, რომელიც წერდა, ამ გზით სისტემა "ბავშვებზე მოქმედებს"-ო, Lil Nas X-მა შემდეგნაირად უპასუხა:

"სისტემა აქ არაფერ შუაშია. ამ ვიდეოკლიპის გადაღება თავად გადავწყვიტე. უკვე ზრდასრული ადამიანი ვარ. არ ვაპირებ, მთელი კარიერა თქვენი ბავშვების აღზრდას მივუძღვნა. ეს თქვენი საქმეა".

კიდევ ერთი მომხმარებელი წერდა, რომ რეპერი სექსუალობის ასე წარმოჩენით "საზოგადოებას ანადგურებს", რაზეც მომღერალმა უპასუხა:

"ყოველ კვირა მასობრივი სროლის შემთხვევებია, თუმცა [აშშ-ის] ხელისუფლება ამის შესაჩერებლად არაფერს აკეთებს. სტრიპტიზის ბოძზე ჩამოსრიალება კი არ არის ის, რითიც საზოგადოება შეიძლება განადგურდეს".

მიუხედავად კრიტიკისა, MONTERO-ს ვიდეოკლიპმა ბევრის მოწონებაც დაიმსახურა და YouTube-ზე უკვე 30 მილიონზე მეტი ნახვა დააგროვა.