საპატრიარქოსთან დაკავშირებულ ფაილებში აღნიშნულია, რომ ქართული ოცნების თავმჯდომარე, ბიძინა ივანიშვილი ბოდბელ ეპისკოპოს იაკობს "ფოსტალიონად" მოიხსენიებს. ამის შესახებ დოკუმენტებში არქიმანდრიტ ბართლომეზე დაყრდნობითაა დაწერილი.

კერძოდ, ფაილებში გვხვდება, სავარაუდოდ, ბართლომე ფირცხალაშვილის საუბარი ერთ-ერთ მონაზონთან, რომელშიც ის ყვება, რომ საჩხერეში სტუმრად იმყოფებოდა ბიძინა ივანიშვილის ოჯახში. მისი მტკიცებით, ივანიშვილთან პატრიარქობის სავარუდო კანდიდატები განიხილეს და იმაზე ისაუბრეს, რომ მეუფე იაკობი მთავრობასა და საპატრიარქოს შორის ე.წ. ფოსტალიონის როლს ასრულებს და მას სერიზოულ ფიგურად არავინ განიხილავს.

"ბ.ფირცხალაშვილის სიტყვებით ბ.ივანიშვილი დაინტერესდა თუ რომელ მღვდელმთავრებს აქვთ პატრიარქობის ამბიცია, რაზეც ბ.ფირცხალაშვილმა დაასახელა მიტროპოლიტები იობი აქიაშვილი, დანიელ დათუათვილი, დიმიტრი შიოლაშვილი და აბრაამ გარმელია. ბ.ფირცხალაშვილი აღნიშნავს, რომ ხსენებული მიტროპოლიტებიდან ბ.ივანიშვილმა და მისმა მეუღლემ, ეკატერინე ხვედელიძემ დადებითად დაახასიათეს აბრაამ გარმელია, რომელიც მოიხსენიეს განათლებულ და რეფორმატორ პიროვნებად. უარყოფითად შეაფასეს იობი აქიაშვილი.

ბ.ფირცხალაშვილის სიტყვებით მისი და ბ.ივანიშვილის საუბარი შეეხო ქორეპისკოპოს იაკობ იაკობაშვილსაც. ამ უკანასკნელს ბ.ივანიშვილი იხსენიებს "ფოსტალიონად" მთავრობასა და საპატრიარქოს შორის, რომელსაც სერიოზულ ფიგურად არავინ განიხილავს", — ვკითხულობთ დოკუმენტში.

ამავე ფაილში ფირცხალაშვილი სხვა მონაზონს უყვება კიდევ ერთ ისტორიას, სავარაუდოდ, ივანიშვილთან შეხვედრის შესახებ. ჩანაწერის მიხედით, ივანიშვილი ნაწყენი იყო იმაზე, რომ პატრიარქმა ექსპრეზიდენტ სააკაშვილს ახალი წელი მიულოცა, თუმცა "არ უნდოდა მოხუცის განაწყენება" და შენიშვნა მის მდივან რეფერანტს, შორენა თეთრუაშვილს მისცა.

"აცნობა, რომ ბ.ივანიშვილი განაწყენებულია და არასწორად მიიჩნევს პატრიარქის მიერ საახალწლო მისალოცი ბარათის გაგზავნას ყოფილი პრეზიდენტის მიხეილ სააკაშვილის მისამართით. ბ.ფირცხალაშვილი აღნიშნავს, რომ ბ.ივანიშვილმა ზემოთხსენებული ფაქტის გამო მხოლოდ იმიტომ უსაყვედურა შორენა თეთრუაშვილს, რადგან არ უნდოდა მოხუცის განაწყენება და არ ადანაშაულებს თეთრუაშვილს წერილთან მიმართებაში. ივანიშვილი ამჟამად ცდილობს მისი პოზიცია მივიდეს პატრიარქის ყურამდე", — ვკითხულობთ დოკუმენტში.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

• მედიის ოთხმა წარმომადგენელმა გავრცელებულ ჩანაწერებში საკუთარი საუბარი ამოიცნო
• რაც ვნახე მესენჯერიდან არის ძალიან ბევრი რამე — კვესიტაძე გავრცელებულ ჩანაწერებზე
• ხაზარაძე გავრცელებული ჩანაწერების ნამდვილობას ადასტურებს
• ტაბულას რედაქტორმა გავრცელებულ ფაილებში საკუთარი საუბარი ამოიცნო

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი:

• პედოფილია, პირადი ცხოვრების დეტალები და კავშირები რუსეთთან — რა წერია გავრცელებულ ფაილებში, ნაწილი I