ევროპული საქართველოს წევრის, ხათუნა გოგორიშვილის თქმით, მეუფე ნიკოლოზთან წლების განმავლობაში ყოველდღიური ურთიერთობა ჰქონდა და დღის მანძილზე რამდენჯერმე ესაუბრებოდა. ასე ეხმაურება ის გავრცელებულ ფაილებს, სადაც აღნიშნულია, რომ მეუფე ნიკოლოზის მეგობარია.

"ბევრი წლის განმავლობაში ყოველდღიური ურთიერთობა მქონდა მეუფე ნიკოლოზ ფაჩუაშვილთან, ის იყო ჩემი მოძღვარი და ასე რომ, დანამდვილებით შემიძლია გითხრათ, რომ ალბათ, ყოველდღე ველაპარაკებოდი, დღეში რამდენჯერმე", — განაცხადა გოგორიშვილმა TV პირველთან.

გამოქვეყნებულ დოკუმენტში ვკითხულობთ:

"ახალქალაქისა და კუმურდოს მიტროპოლიტი ნიკოლოზ (პაატა) ფაჩუაშვილი. მეგობრობს პარტია ერთიანი ნაციონალური მოძრაობის წევრ ხათუნა გოგორიშვილთან და პარტია ევროპული საქრთველოს წევრ ხათუნა ოჩიაურთან. პერიოდულად საპყრობილეში ხვდება შსს ყოფილ მინისტრებს ვანო მერაბიშვილს და ბაჩო ახალაიას".

გოგორიშვილის მტკიცებით, ხელისუფლება იმდენად ცუდ დღეშია, რომ აღნიშნულ ჩანაწერებს საპატრიარქოსთვის "ყელში მოსაჭერად" იყენებს.

"ამას [ჩანაწერების გამოქვეყნებას] ერთადერთი მიზეზი აქვს, იმდენად გაუჭირდათ და იმდენად ცუდ დღეში არიან, რომ მათ სჭირდებათ რაღაც ახალი "ყელში მოჭერა" საპატრიარქოსთვის — თუ ჭკვიანად არ იქნებით, თუ ღიად, საჯაროდ, ყველგან მხარს არ დაგვიჭერთ ამ არჩევნებზე და სრულიად საპატრიარქო მთელი თავისი განშტოებებით არ იქნება ქართული ოცნების სამსახურში — აი, ასეთ ამბავს გიზამთ", — ამბობს ის.

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

გავრცელებულ ჩანაწერებთან დაკავშირებით ინფორმაციის მისაღებად On.ge სუს-თან დაკავშირებას შეეცადა. უწყების პრესსამსახურში, ჯერჯერობით, ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.

ამავე თემაზე: