პარტია საქართველოსთვის თავმჯდომარის მოადგილის, ნათია მეზვრიშვილის განცხადებით, გენერალური პროკურორის არჩევის წესის ჩაგდებით ქართულმა ოცნებამ საზოგადოებას უთხრა, რომ არ ვიმსახურებთ დამოუკიდებელ პროკურატურას. მეზვრიშვილის თქმით, ეს ცვლილება იყო ერთ-ერთი მნიშვნელოვანი ფაქტორი ინსტიტუტის დამოუკიდებლობისთვის.

"კვალიფიციური უმრავლესობით გენერალური პროკურორის არჩევა არ არის ერთადერთი გზა პროკურატურის დამოუკიდებლობისკენ, მაგრამ, არის ერთ-ერთი მნიშვნელოვანი წინ გადადგმული ნაბიჯი. ამის ჩაგდებით ჩვენ ქართულმა ოცნებამ გვითხრა — ისევე როგორც სასამართლოსთან დაკავშირებით — რომ ეს ქვეყანა არ იმსახურებს დამოუკიდებელ პროკურატურას", — განაცხადა ნათია მეზვრიშვილმა.

ის ამბობს, რომ პროკურატურის დამოუკიდებლობის მხრივ ბევრი რამ გაკეთდა, თუმცა ფიქრობს, რომ ეს ყველაფერი"დარჩა ქაღალდზე".

7 სექტემბერს, პარლამენტმა პირველი მოსმენით მიიღო საკონსტიტუციო ცვლილებები, თუმცა კანონპროექტიდან ამოიღო გენერალური პროკურორის არჩევის წესი. ამ საკითხზე მმართველი პარტია და ოპოზიცია ვერ შეთანხმდა.