სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა წინასწარი შეთანხმებით ჯგუფის მიერ თაღლითობის მცდელობის ფაქტზე საქართველოს ორი მოქალაქე დააკავეს. ამის შესახებ ინფორმაციას სუს-ის პრესსამსახური ავრცელლებს.

მათივე ინფორმაციით, ჩატარებული ოპერატიულ-სამძებრო და საგამოძიებო მოქმედებების შედეგად, გამოძიებამ დაადგინა, რომ დაკავებული პირები ერთმანეთთან წინასწარი შეთანხმებით, მოქალაქეს საკუთრებაში არსებულ მიწის ნაკვეთზე 10 ათასი აშშ დოლარის სანაცვლოს მშენებლობის ნებართვის გაცემაში დახმარებას დაჰპირდნენ.

„აღნიშნულმა პირებმა მოქალაქეს თაღლითურად, წინასწარ გამოართვეს მათ მიერ მოთხოვნილი თანხა 10 000 აშშ დოლარის ოდენობით, რა დროსაც ისინი სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დააკავეს,”- აცხადებენ სუს-ში.

საქმეზე გამოძიება საქართველოს სისხლის სამართლის კოდექსის მე-19 და 180-ე მუხლებით მიმდინარეობს. მე-19 მუხლის მიხედვით, დანაშაულის მცდელობად ითვლება განზრახი ქმედება, რომელიც თუმცა უშუალოდ მიმართული იყო დანაშაულის ჩასადენად, მაგრამ დანაშაული ბოლომდე არ იქნა მიყვანილი. 180-ე მუხლის მიხედვით, კი თაღლითობა, ესე იგი მართლსაწინააღმდეგო მისაკუთრების მიზნით სხვისი ნივთის დიდი ოდენობით დაუფლება ან ქონებრივი უფლების მიღება მოტყუებით, ჩადენილი წინასწარი შეთანხმებით ჯგუფის მიერ ისჯება ექვსიდან ცხრა წლამდე თავისუფლების აღკვეთით.