დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, დღეს გამოქვეყნებული კოვიდსტატისტიკა არაზუსტია. გამყრელიძის თქმით, ეს დაკავშირებულია იმასთან, რომ გუშინ მთელი დღის განმავლობაში სერვერებზე სერიოზული შეფერხებები იყო, რომელთანაც მათ რამდენიმე პორტალს აქვს კავშირი, მათ შორის ვაქცინაციის, Covid-19-ის დიაგნოსტიკის პორტალს და ამის გამო გუშინდელი ყველა შედეგი პორტალზე ატვირთული არ არის.

"დღევანდელი 1 965 ახალი შემთხვევა არ არის რეალური ციფრი. რამდენადაც დღეს ჩვენი პროგნოზით ველოდებოდით, რომ წინა სამშაბათთან შედარებით კლება უნდა ყოფილიყო. დაახლოებით კვირის განმავლობაში 700, 800, 900 შემთხვევით გვაქვს კლება. მოგეხსენებათ, ჩვენ გვაქვს პროგნოზირება მთელი თვის განმავლობაში. წინა კვირაში გვქონდა 4 700-ის ფარგლებში, დღეს ველოდებოდით, რომ უნდა ყოფილიყო 3 500-3 700-ის ფარგლებში. არის 1 965 შემთხვევა. ეს შედეგები, ალბათ, დღის განმავლობაში აიტვირთება და ხვალ ვნახავთ, როგორი იქნება შემთხვევათა რაოდენობა", — თქვა გამყრელიძემ.

საკოორდინაციო საბჭოს სხდომის დასრულების შემდეგ მან, ასევე, განაცხადა, რომ დღეს დადებითობის მაჩვენებელი 7%-ის ფარგლებშია. ბოლო 7 და 14 დღის განმავლობაში ის 9%-ს ჩამოსცილდა, რაც ქვეყნის მთავარი ეპიდემიოლოგის თქმით, ქვეყანაში ეპიდსიტუაციის გაუმჯობესებას მიუთითებს.