სხვა დროს თუ არა, ალბათ ბოლო პერიოდში მაინც გიოცნებია, ცოტა ხნით გამქრალიყავი ამ სამყაროდან და შუახმელეთში, ნარნიაში ანდაც სულაც სხვა პლანეტაზე აღმოჩენილიყავი. თუმცა, თუკი ამ სამყაროებში მოგზაურობას ვერ ახერხებ, მისი შექმნა თავად შეგიძლია. როგორც ეს 37 წლის იტალიელმა კონდიტერმა, ნიკოლა ჯენტილემ, გააკეთა.

ჯენტილემ ტოლკინისეული ისტორიის ეკრანიზაციის მიხედვით ქალაქ ბუკიანიკოს მახლობლად მაზრის საკუთარი ვერსია შექმნა, ჰობიტის სოროთი და სხვა ყველა აუცილებელი ატრიბუტებით.

სწორედ ასე დაიწყო კონდიტერმა ჰობიტის ცხოვრება. იგი საკუთარ თავს მაზრის მმართველად მიიჩნევს და თავის გამომწერებს ინსტაგრამზე ყოველდღიურობას უზიარებს.

"ყოველთვის მიყვარდა ფენტეზის ჟანრის ლიტერატურა, ფილმები და ვიდეოთამაშები. თუმცა, ცხოვრების რაღაც ეტაპზე გავიაზრე, რომ სხვისი თავგადასავლებით ვცხოვრობდი და არა — ჩემით. მერე კი გადავწყვიტე, რომ თავადაც შემეძლო ჩემი საყვარელი ფილმებისა და წიგნების პერსონაჟებივით ცხოვრება".

ჯენტილე კონდიტერად მუშაობდა იტალიის რეგიონ აბრუცოში, როცა გაიაზრა, რომ თავის გარშემო გორები, ტყეები, მდინარეები და ძველი სოფლები ძალიან ჰგავდა მაზრას — მხოლოდ ჰობიტის სახლები თუ აკლდა. 2018 წელს მან მიწის ნაკვეთი შეიძინა და თავისი ოჯახისათვის გორაკში, ტყეების მახლობლად, სახლი "გამოთხარა". ჯენტილეს თქმით, ეს ყველაფერი თითქმის მთელი ცხოვრების დანაზოგი დაუჯდა.

კონდიტერის ყველაზე დიდი მიღწევა მაინც მთა ვეზუვის დალაშქვრაა. თუმცა, კვლავაც ტოლკინისეულ სტილში — რამდენიმე მეგობრისგან შემდგარმა ჯგუფმა 290-კილომეტრიანი მოგზაურობა გიმლის, ლეგოლასის, გენდალფისა და არაგორნის კოსტიუმებში გამოწყობილმა დაიწყო. მოგზაურობის მიზანი კი მხოლოდ ერთი იყო — ლეგენდარული "ერთი ბეჭდის" სცენის გაცოცხლება ვეზუვის ვულკანურ კრატერთან.

ამჟამად ჯენტილე ჰობიტების დასახლების გაფართოებაზე მუშაობს, რათა დიდი მიწისქვეშა სახლი და კიდევ ოთხი პატარა სახლი შექმნას სხვა ოჯახებისათვის. თუმცა, აღნიშნავს, რომ ადგილის ტურისტული მარშრუტის დანიშნულებად ქცევას არ აპირებს.

"ეს პროექტი მისგან სარგებლის მიღებას არ ისახავს მიზნად. მხოლოდ ის მინდა, ჩემნაირ ადამიანებს შევხვდე, ვისაც თვალებში მაგია უღვივის და ცხოვრებაში მარტივი რაღაცები მოსწონს. ვისაც მეგობრებთან ვახშმობა და ტყეებში ხეტიალი უყვარს".