ევროპული საქართველო ტელეკომპანია იმედს საარჩევნო ვიდეოს გაშვებაზე უარის თქმის გამო უჩივის. პარტიის ერთ-ერთმა ლიდერმა, გიორგი ნონიაშვილმა განაცხადა, რომ მათი ვიდეო არ ეწინააღმდეგება არანაირ კანონს.

"ჩვენი ვიდეორგოლი არ ეწინააღმდეგება მაუწყებლის შესახებ კანონს და არც რაიმე კანონს, მათ შორის გამოხატვის თავისუფლების შესახებ ნორმებს, ის ფარგლებში ჯდება სრულიად. ამიტომ ჩვენ გადავწყვიტეთ ტელეკომპანია იმედს ვუჩივლოთ და საჩივარი შევიტანოთ ტელეკომუნიკაციების მარეგულირებელ ეროვნულ კომისიაში და ამასთან დაკავშირებით ვიდავოთ", — განაცხადა ნონიაშვილმა.

ამასთანავე, ევროპული საქართველო მზადაა ტელეკომპანიას შესთავაზოს განსხვავებული ტონისა და შინაარსის ვიდეო, რომელიც შექმნილი იქნება ქართული ოცნების რიტორიკის მიხედვით.

"რადგან პრობლემა აქვთ ასეთი ტიპის და ტონალობის კლიპთან დაკავშირებით, მიუხედავად იმისა, რომ მათ არ აქვთ ვალდებულება კლიპის შინაარსში შევიდნენ, ჩვენ ვთავაზობთ განსხვავებულ ტონს ვიდეორგოლისა, რომელიც ბევრად უფრო რბილი და ბევრად უფრო ფუმფულაა და მოიცავს მთლიანად ქართული ოცნების ძირითად მესიჯბოქსს, როგორ დუღს ეკონომიკა, როგორ ვართ მოწინავე ადგილზე კოვიდთან ბრძოლაში და ასე შემდეგ. გვაინტერესებს გაუშვებს თუ არა ტელეკომპანია იმედი ასეთ კლიპს, რომელიც ქართული ოცნების რიტორიკის მიხედვითაა შექმნილი", — ამბობს ნონიაშვილი.

ტელეკომპანია იმედმა 25 აგვისტოს გამოაქვეყნა განცხადება, რომლის მიხედვითაც, ევროპული საქართველოს წინასაარჩევნო პოლიტიკურ რეკლამას ეთერში არ გაუშვებენ, ამის მიზეზად კი სიძულვილის ენა დაასახელეს. განცხადების მიხედვით, ევროპული საქართველო პირველი პარტიაა, რომელსაც იმედი ეთერს არ დაუთმობს.

გიგა ბოკერია იმედის გადაწყვეტილებას "კანონის უხეშ დარღვევას" უწოდებს და ამბობს, რომ კანონი ყველა ტელევიზიას პოლიტიკური რეკლამის ეთერში გაშვებას პოლიტიკური ცენზურის გარეშე ავალდებულებს.

საქართველოს პრემიერმინისტრი, ირაკლი ღარიბაშვილი ტელეკომპანია იმედის მიერ ევროპული საქართველოს წინასაარჩევნო პოლიტიკური რეკლამის განთავსებაზე უარის თქმას დადებითად აფასებს და ამბობს, რომ ეს "ძალიან კარგია".