ქაბულში თანასწორუფლებიანობისთვის გამართულ ქალთა საპროტესტო აქციაზე თალიბანმა ცრემლსადენი გაზი გამოიყენა და ჰაერში გამაფრთხილებელი სროლა განახორციელა. ინფორმაციას ადგილობრივი მედია და მოსახლეობა ავრცელებს.

ტვიტერზე გავრცელდა დაპირისპირებისას დაშავებული ქალის ვიდეო.

ასევე, ავღანელი ქალის მიერ ტვიტერზე გავრცელებულ ერთ-ერთ ვიდეოში ჩანს, როგორ უჭირთ სუნთქვა აქციის მონაწილეებს.

ეს ქალების მიერ გამართული პირველი აქცია არ არის. გუშინ, 3 სექტემბერს, ავღანეთში 80-მდე ქალმა თალიბანისგან მუშაობისა და განათლების უფლებები მოითხოვა.

თალიბანი, რომელიც ავღანეთს 1996-2001 წლებში მართავდა, განსაკუთრებით სასტიკი იყო ქალების მიმართ. მათ აკრძალული ჰქონდათ განათლების მიღება, მუშაობა, გარეთ კაცის გარეშე გასვლა ან საჯაროდ ისეთი ტანსაცმლით სიარული, რომელშიც სხეულის რომელიმე ნაწილი ან სახე დაფარული არ ექნებოდათ. არასრულწლოვანი გოგოების დიდ ნაწილს მათზე ბევრად უფროს კაცებზე აქორწინებდნენ და ნებისმიერი წესის დარღვევის შემთხვევაში, სასტიკად, წამებით ან სიკვდილით სჯიდნენ. არსებული წესები 2001 წელს შეიცვალა, როდესაც აშშ-მ თალიბანის ძალაუფლება დაამხო. დღეს ყველაფერი ისევ შეიცვალა.

ავღანეთზე კონტროლის ხელში აღების შემდეგ, თალიბანის პრესსპიკერმა მედიასთან პირველ პრესკონფერენციაზე ქალთა უფლებებზე ისაუბრა. მან ამ საკითხს "ძალიან მნიშვნელოვანი" უწოდა და თქვა, რომ მხარს უჭერენ ქალთა უფლებებს, თუმცა მხოლოდ შარიათის კანონის ფარგლებში. მას შემდეგ კი, რაც თალიბებმა ავღანეთი დაიკავეს, არაერთმა ავღანელმა ქალმა საჯაროდ ისაუბრა საკუთარი შიშებისა და მოლოდინების შესახებ.

გაიგეთ მეტი: