ნაციონალური მოძრაობის ყოფილი თავმჯდომარე, გრიგოლ ვაშაძე განმარტავს, რატომ არ უპასუხა პარტიის დამფუძნებლის, მიხეილ სააკაშვილის სატელეფონო ზარებს.

"პატიოსნად ვამბობ, არ ვთვალთმაქცობ, ან გამომრჩა, ან არ შემოსულა [...] იცით რა, აი, ის ტელეფონი [ნომერი], რომელიც ყველას გაქვთ, იყო გათიშული 15 დეკემბრიდან მთელი ზაფხულის შუამდე", — განაცხადა გრიგოლ ვაშაძემ TV პირველის ეთერში.

გრიგოლ ვაშაძემ ნაციონალური მოძრაობა სწორედ 15 დეკემბერს დატოვა. ეს გადაწყვეტილება მან სოციალური ქსელის საშუალებით გაასაჯაროვა. კითხვაზე, რატომ არ ჩათვალა საჭიროდ სააკაშვილთან საუბარი ამ თემაზე, ვაშაძემ პასუხობს, რომ ყველაფერი, რაც სათქმელი ჰქონდა საჯარო განცხადებით თქვა.

"თვე-ნახევარი ვაფრთხილებდი ყველას, რომ მივდივარ და ყველა ამაზე ჰეჰეჰეჰე — ასე იცინოდა. [...] ყველა შემთხვევაში [მივდიოდი], მაგრამ, ბოლო წვეთი იყო ის, რაც განცხადებაში წაიკითხეთ", — განაცხადა გრიგოლ ვაშაძემ.

განცხადებაში, რომლითაც ვაშაძემ პარტია დატოვა, ვკითხულობთ, რომ მისთვის მიუღებელი იყო პარტიული სტრატეგიის არარსებობა. ის წერდა, რომ ვერ შეეგუება "ოდიოზური ფიგურების" გამოჩენას. ასევე, მოკავშირე ქვეყნების წარმომადგენელი დიპლომატების წინააღმდეგ "გაჩაღებული თავდასხმებისა და შეურაცხყოფის კამპანიას", რომელიც, მისივე თქმით, პარტიის წევრთა ნაწილმა სხვებთან კონსულტაციების გარეშე წამოიწყო. პარტიის დატოვებისას ვაშაძემ განაცხადა, რომ არ შეუძლია იყოს იქ, სადაც შეცდომებზე სწავლის შესაძლებლობას და სურვილს ვერ ხედავს.

29 აგვისტოს ცნობილი გახდა, რომ გრიგოლ ვაშაძე სტრატეგია აღმაშენებლის ლიდერობით დაფუძნებული ახალი პოლიტიკური პლატფორმის, მესამე ძალის წევრი გახდა.

გაიგე მეტი: