ენმ-დან წასული და მესამე ძალასთან გაერთიანებული გრიგოლ ვაშაძე კითხვაზე, რატომ არ დაუკავშირდა ნიკა მელიას მისი ციხეში ყოფნისას და გამოსვლის შემდეგ, პასუხობს, რომ მელია აქ არაფერ შუაში იყო და რეალურად იმ ადამიანებთან კონტაქტი არ სურდა, ვინც იგი ზვარაკად შესწირა. ამის შესახებ მან TV პირველის ეთერში ისაუბრა.

"მეგობრული კავშირი ნიკასთან არ გამიწყვეტია, არც ვაპირებ და ყოველთვის გამიხარდება მასთან შეხვედრა. [...] ნიკას გარშემო რა ხდებოდა, დეტალურად ვიცოდი. სიმართლე გითხრათ, აქ ნიკა არაფერ შუაშია. არ მინდოდა იმ ადამიანებთან ერთად ყოფნა, ვინც ის ზვარაკად შეწირეს. კატეგორიულად არ მინდა ამ თემაზე ლაპარაკი, მაგრამ რომ გამოდიხარ ტელევიზიით, იბრიქები და იმას ჰპირდები, რომ ამას მოახდენ, ალყას გაუძლებ 9 თვე და შემდეგ ადამიანს ციხეში უშვებ, აი, იმ ხალხთან ყოფნა მე კატეგორიულად არ მინდოდა", — აცხადებს ვაშაძე.

ვაშაძის თქმით, მისი ამ გადაწყვეტილების შესახებ პარტიის წევრების ნაწილი, რომელთანაც მეგობრული ურთიერთობა ჰქონდა, გაფრთხილებული იყო.

27 თებერვალს მელიამ განცხადა, რომ "გული სწყდება, ბევრმა ყოფილმა ქოცმა დაიცვა საჯაროდ", მაგრამ საკუთარი პარტიის ყოფილ თავმჯდომარეს, გრიგოლ ვაშაძეს მის დაკავებაზე "სიტყვა არ დაუძრავს".

20 ივნისს ვაშაძემ ამასთან დაკავშირებით კომენტარი გააკეთა და თქვა, რომ რადგან მელიას არ დაუკავშირდა, ამისთვის "სერიოზული მიზეზები ჰქონდა".