პარტია საქართველოსთვის წევრი, ნათია მეზვრიშვილი ენმ-ის მიერ შარლ მიშელის დოკუმენტზე ხელმოწერას ძალიან დაგვიანებულად მიიჩნევს. მისი განცხადებით, ქართულმა ოცნებამ ენმ–ის გადაწყვეტილება შეთანხმებაზე ხელის არმოწერის შესახებ უკვე სათავისოდ გამოიყენა.

"არანაირი მნიშვნელობა ახლა ამ ხელმომწერას არ აქვს. სადღაც გვიან რომ გააცნობიერა ნაციონალურმა მოძრაობამ, რომ ქვეყნის დასავლური განვითარების გზას ამითი საფრთხე შეექმნა, სამწუხაროდ, გვიანია. იმიტომ, რომ მათი მხრიდან ხელმოუწერლობა გამოიყენა ქართულმა ოცნებამ მიზეზად, რომ შეთანხმების პირობები დაერღვია, და ამ შეთანხმებიდან ცალმხრივად გასულიყო", — განაცხადა მეზვრიშვილმა TV პირველი ეთერში.

მეზვრიშვილის ამბობს, რომ ორივე პარტია ხშირად ასხამს ერთმანეთის წისქვილზე წყალს.

დღეს, 1–ელ სექტემბერს, ერთიანი ნაციონალური მოძრაობა შარლ მიშელის შეთანხმებას შეუერთდა და ხელშეკრულებას ხელი მოაწერა. შეგახსენებთ, რომ ქართულმა ოცნებამ შეთანხმება ანულირებულად გამოაცხადა ხელმოწერიდან 100 დღის შემდეგ, მიზეზად კი ის დაასახელა, რომ ენმ-მ ხელი არ მოაწერა და ოპოზიცია ვალდებულებებს არ ასრულებდა.