პრემიერმინისტრი ირაკლი ღარიბაშვილი ენმ-ს მიერ შარლ მიშელის დოკუმენტზე ხელმოწერას პოლიტიკურ თაღლითობას უწოდებს. პრემიერმინისტრის თქმით, ტრაგედიაა, ქვეყანაში მთავარი ოპოზიციური ძალა ნაციონალური მოძრაობა იყოს და კიდევ ერთხელ იმეორებს, რომ ქართული ოცნება იყო პირველი პარტია, რომელიც მიშელის დოკუმენტზე ხელმოწერით კომპრომისზე წავიდა.

"ისინი დღეს გამოდიან, საუბრობენ რაღაც მაღალ მატერიებზე და აი, თუნდაც, გუშინ გავიგეთ, რომ გადაწყვიტეს თურმე, რაღაც მორიგი პოლიტიკური თაღლითობა მოიფიქრეს და მათ ევროკავშირის მედიაციით შემდგარ დოკუმენტზე გადაწყვიტეს ხელმოწერა. ეს ძალიან მარტივი აღსაქმელი და ასახსნელია — ჩვენ 3 თვის განმავლობაში ველოდით მათ ხელმოწერას, ჩვენ ვიყავით პირველი, რომელმაც გადადგა ეს ნაბიჯი, ამ კომპრომისზე წავიდა", — აცხადებს ღარიბაშვილი.

დღეს ნაციონალური მოძრაობა მიშელის შეთანხმებას შეუერთდა. დოკუმენტზე ხელმოსაწერად ევროკავშირის წარმომადგენლობის ოფისში პარტიის თავმჯდომარე, ნიკა მელია და სხვა ლიდერები მივიდნენ. ხელმოწერის შემდეგ ნიკა მელიამ განაცხადა, რომ ამ ნაბიჯით მათ ქართული ოცნება შებოჭეს და არ მისცემენ საშუალებას გადაუხვიონ დასავლურ კურსს.

გუშინ, 1-ელ სექტემბერს ნიკა მელიამ სპეციალური ბრიფინგი გამართა და განაცხადა, რომ პარტია შარლ მიშელის დოკუმენტს ხელს მოაწერს. მისივე თქმით, ევროკავშირის მაკროფინანსური დახმარებაზე უარის თქმა და ქართული ოცნების ბოლო განცხადებები არის ღია პოლიტიკური განაცხადი საგარეო პოლიტიკური კურსის ცვლილებაზე და სწორედ ეს გახდა მათთვის ბიძგი, რომ შეთანხმებისთვის ხელი მოეწერათ. მელიამ აღნიშნა, რომ ეს ნაბიჯი კიდევ უფრო დააახლოებს და შეკრავს ყველას, ვისთვისაც ძვირფასია საქართველოს ევროპული მომავალი.