ევროპარლამენტარის, ვიოლა ფონ კრამონის განცხადებით, საქართველოს მთავრობამ დაასწრო ევროკავშირს, რადგან ჰქონდა მოლოდინი, რომ დახმარებას ვერ მიიღებდნენ პირობების არშესრულების გამო. მისი თქმით, არჩევნების წინ მმართველი პარტიის შანსები კარგად არ გამოიყურება და იცოდნენ, რომ ევროკავშირის განცხადება მეორე ტრანშის არჩარიცხვაზე მათ რეპუტაციულად დააზიანებდა.

"საქართველოს მუნიციპალური არჩევნები ელოდება და არ გამოიყურება კარგად მმართველი პარტიის შანსები და თუ გამოაცხადებდა ევროკავშირი, რომ არ იქნებოდა მეორე ტრანში, რადგან მთავრობამ ვერ შეასრულა კრიტერიუმები, რადგან სრულიად შეგნებულად არ მოახდინეს სასამართლოს რეფორმა, მაშინ მათ რეპუტაცია დაუზიანდებოდათ და შესაბამისად, დაასწრო მთავრობამ და საკმაოდ გულუხვად განაცხადა, რომ არ სჭირდებათ. მაგრამ ამით დააზიანა საქართველოს მოქალაქეები. ეს ძალიან ცუდი გადაწყვეტილებაა ჩემი აზრით, აქ არ არის საუბარი ევროკავსირსა და ჩვენზე, საუბარია საქართველოს მოქალაქეებზე", — განაცხადა მან ფორმულას ეთერში.

კრამონის თქმით, სამწუხაროა, მაგრამ ბოლო პერიოდში მთავრობამ სრულიად გადაუხვია და დაემშვიდობა რეფორმების დღის წესრიგს. მისი თქმით, უზენასის მოსამართლეები ყველა კრიტერიუმისა და მოთხოვნის დარღვევით არიან შერჩეული და საქართველოს მთავვრობამ დაარღვია ხელშეკრულების პირობები.

"ეს არის სწორედ ის წერტილი, როცა უნდა ვთქვათ, რომ ძალიან გულდაწყვეტილი და შოკირებული ვართ იმით, თუ რატომ ცალმხრივად იმოქმედა საქართველოს მთავრობამ და რატომ თქვა უარი საკუთარ ხელშეკრულებასა და შეთანხმებაზე", — განაცხადა მან.

კრამონმა აღნიშნა ისიც, რომ საქართველოზე ეკონომიკურად უკეთ მყოფმა ქვეყნებმაც კი არ თქვეს უარი მაკროფინანსურ დახმარებაზე.

პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროფინანსური დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".

ამასთანავე, საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".