დეპუტატი რომან გოცირიძე აცხადებს, რომ მთავრობამ წინმსწრებად თქვა უარი ევროკავშირის დახმარებაზე, რათა ის სანქციად არ გამოცხადებულიყო. ასე ეხმაურება გოცირიძე პრემიერმინისტრს, ირაკლი ღარიბაშვილს, რომელმაც თქვა, რომ ევროკავშირის მაკროსაფინანსო დახმარების მეორე ნაწილის აღებისგან თავის შეკავება გადაწყვიტეს.

"ეს რომ პირდაპირ სანქციად რომ არ ყოფილიყო გამოცხადებული, მთავრობამ წინმსწრებად უარი თქვა მის მიღებაზე. ფული სექტემბერში უნდა ჩარიცხულიყო. როცა უარს ამბობ უპროცენტო და მრავალი წლის შემდეგ დასაბრუნებელ სესხზე, მაშინ რატომ უნდა აიღო პროცენტიანი ფული?

არა და ევროკავშირის 4 მილიარდი ევროს ოდენობის დახმარება მომავალო ხუთი წლის განმავლობაში, სულ ახლახან იყო დაპირებული ევროკომისიის მიერ და ღარიბაშვილიც სიამაყით აცხადებდა ამაზე. დაიკარგა 300 მილიონი ლარი მომდინარე წლის ბიუჯეტში და დაზიანდა ქვეყნის რეპუტაცია. ეს აუცილებლად მოახდენს გავლენას სხვა დონორების ქცევაზეც", — წერს გოცირიძე სოციალურ ქსელში.

დღეს, ირაკლი ღარიბაშვილმა განაცხადა, რომ საქართველო თავს შეიკავებს ევროკავშირის მაკროსაფინანსო დახმარების მეორე ნაწილის აღებისგან. თავდაცვის მინისტრის, ჯუანშერ ბურჭულაძის თქმით, კი მთავრობა თავად გადაწყვეტს, "ესა თუ ის დაფინანსება გვინდა თუ არ გვინდა".

გუშინ, 31 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მიკროსაფინანსო დახმარებას "ფინანსური დატვირთვა აღარ აქვს".

24 აგვისტოს, ევროპული საბჭოს პრეზიდენტმა, შარლ მიშელმა ღარიბაშვილთან შეხვედრის შემდეგ განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".

გაიგე მეტი: