ექსპრეზიდენტის, მიხეილ სააკაშვილის განცხადებით, 2 ოქტომბრის არჩევნების გადადება საერთოდ არ უნდა განიხილებოდეს. მისი თქმით, პირიქით, არჩევნების დაჩქარებაა საჭირო. ამის შესახებ მან საკუთარ Facebook გვერდზე დაწერა.

"გადადება კი არა, დაჩქარებაა საჭირო და პირიქით, აქეთ გადმოდება — ჩვენ გვჭირდება ახლა მობილიზაცია, მოქმედება და გამარჯვება ჩვენი იქნება ყველა შემთხვევაში, ოღონდ რა თქმა უნდა, მთელი ძალების მობილიზაციის პირობებში. მე ამ პროცესში ვარ ჩართული ბოლომდე და მე, მიხეილ სააკაშვილი კატეგორიულად წინააღმდეგი ვარ ყველანაირი გადადების, ამ რეფერენდუმის", — წერს ის.

სახალხო დამცველი, ნინო ლომჯარია აცხადებს, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

სახალხო დამცველის განცხადებას პრემიერმინისტრი, ირაკლი ღარიბაშვილიც გამოეხმაურა და განცხადა, რომ ეს ნაციონალური მოძრაობის შემუშავებული გეგმის ნაწილია.