საგარეო საქმეთა მინისტრი, დავით ზალკალიანი ამტკიცებს, რომ 19 აპრილის შეთანხმების მნიშვნელოვანი ნაწილი შესრულებულია და პროცესი გრძელდება. ასე ეხმაურება ის შეთანხმების ინიციატორის, ევროპული საბჭოს პრეზიდენტის, შარლ მიშელის განცხადებას შეთანხმების შესრულების საჭიროებაზე.

ზალკალიანის თქმით, კიევში, ყირიმის სამიტზე შარლ მიშელისა და პრემიერმინისტრ, ირაკლი ღარიბაშვილის შეხვედრა "ძალიან თბილი და მეგობრული" იყო.

"კიდევ ერთხელ იქნა ჩვენი მხრიდან დადასტურებული, რომ საქართველო ერთგულია იმ რეფორმების, რა რეფორმებზეც არის საუბარი 19 აპრილის შეთანხმებით; იყო დადასტურებული, რომ ამ რეფორმების მნიშვნელოვანი ნაწილი არის შესრულებული და ასევე, ის, რომ საქართველოს ხელისუფლება თანმიმდევრული იქნება მომავალშიც. ყველა ის ძირითადი მიმართულება, რომელზეც საუბარი არის 19 აპრილის შეთანხმებაში, იქნება საბოლოოდ შესრულებული [...]

რეფორმები, ერთ დღეში, ერთ კვირაში და ერთ თვეში არ სრულდება. მუდმივი პროცესია, რომელზეც მუდმივად უნდა იყოს მუშაობა და ამის მზაობა და თანმიმდევრულობა, რომ ეს პროცესი იყო ლოგიკურ დასასრულამდე მიყვანილი, არის საკმაოდ გაცხადებული.", — განაცხადა დავით ზალკალიანმა.

კითხვას, როგორ აპირებს მმართველი პარტია შეთანხმების შესრულებას, რომელიც თავადვე გამოაცხადა ანულირებულად, ზალკალიანმა უპასუხა, რომ ქართული ოცნება მაინც შესრულებას ვალდებულებებს. ის ფიქრობს, რომ "საზოგადოებას ძალიან მკაფიოდ განემარტა", რატომ გახდა საჭირო შეთანხმების ანულირება.

"შეთანხმება მაშინ ითვლება შეთანხმებად, როდესაც მისი ყველა ხელმომწერი ასრულებს ამ შეთანხმებას და არგუმენტი, რომელიც თქვენ იხილეთ და საზოგადოებას ძალიან მკაფიოდ განემარტა იყო ის, რომ შეთანხმების ერთი მნიშვნელოვანი მონაწილე [ნაციონალური მოძრაობა] საერთოდ არ შეუერთდა ამ შეთანხმებას", — განაცხადა ზალკალიანმა.

შარლ მიშელმა ირაკლი ღარიბაშვილთან შეხვედრის შემდეგ ტვიტერის ოფიციალურ გვერდზე დაწერა, რომ საქართველოსთვის რეფორმები ახლა საჭიროა ისე, როგორც არასდროს. მან მთავრობას შეთანხმების ერთგულებისკენ მოუწოდა და თან მიანიშნა, რომ მაკროსაფინანსო დახმარების გაცემის ვადა ახლოვდება.