ამერიკელმა მსახიობმა და მომღერალმა, ბარბრა სტრეიზანდმა, 2018 წელს გამოსულ პოპულარულ ფილმზე, A Star Is Born-ზე ისაუბრა, რომელიც 1976 წლის ვერსიის რიმეიქია; ამ უკანასკნელში კი თავად სტრეიზანდი მონაწილეობს.

"როცა პირველად გავიგე, რომ თავიდან იღებდნენ, მასში უილ სმითსა და ბიონსეს უნდა ეთამაშათ", — ამბობს ბარბრა, — "მაშინ ვიფიქრე, რომ ეს საინტერესო იყო და ორიგინალური ვერსიისგან უფრო განსხვავებული იქნებოდა: განსხვავებული ტიპის მუსიკა, შეხმატკბილებული მსახიობები — მეგონა, შესანიშნავი იდეა იყო. ამიტომ, გავოცდი, როცა ვნახე, რამდენად ჰგავდა საბოლოო ვერსია 1976 წელს გადაღებულს".

ავსტრალიურ სატელევიზიო გადაცემაში, The Sunday Project, სტრეიზანდმა აღნიშნა, რომ რიმეიქის გადაღება "ცუდი აზრი" იყო, თუმცა, მის წარმატებაზე "სიტყვა არ ეთქმის".

ფილმის წარმატება კი ნამდვილად თვალშისაცემია; კინოაკადემიის დაჯილდოებაზე ის ნომინირებული იყო საუკეთესო კინოსურათის კატეგორიაში, გამოიმუშავა $436 მილიონი, ლედი გაგამ კი თავისი პირველი ოსკარი მიიღო. ფილმის საუნდტრეკის ერთ-ერთი სიმღერა, Shallow, მოგვიანებით მსოფლიო ჰიტადაც იქცა.

თუმცა, სტრეიზანდი იმასაც დასძენს, რომ ფილმის წარმატება "დიდად არ ადარდებს, რადგან ის ორიგინალურს ქმნის".

აღსანიშნავია, რომ 1976 წლის ვერსიაც არ ყოფილა ორიგინალური. ის, თავის მხრივ, რიმეიქია 1954 წელს გამოსული ფილმისა, სადაც მთავარ როლებს ჯუდი გარლანდი და ჯეიმს მეისონი ასრულებდნენ. ეს ვერსია კი ასევე რიმეიქია 1937 წლის ორიგინალური ვერსიისა, რომელშიც ჯენეტ გეინორმა და ფრედრიკ მარჩმა ითამაშეს.

თავად სტრეიზანდმა წინათ კუპერისა და გაგას ვერსიას ხოტბა შეასხა. 2018 წელს მან აღნიშნა, რომ "ფილმი მოეწონა, გაგა კი მასში შესანიშნავი იყო", თუმცა, ისიც აღნიშნა, რომ განსხვავებულს ელოდა.

"ვერ ვიჯერებ, რომ ეს ყველაფერი ლამის 40 წლის წინ იყო. ვფიქრობ, რეჟისორმა გაგაზე შესანიშნავად იმუშავა. ისე, როცა გავიგე, რომ ამას იღებდნენ, ვიფიქრე, რომ განსხვავებული იქნებოდა: განსხვავებული წარმომავლობის მსახიობები ითამაშებდნენ, მუსიკად კი ალბათ რეპს გამოიყენებდნენ. თუმცა, რაც გამოვიდა, ჩემს ფილმს უფრო ჰგავს".