რამდენიმე დღის წინ გიამბეთ ერთ-ერთ პოდკასტში კვენტინ ტარანტინოს სტუმრობის შესახებ, სადაც თანამედროვეობის ამ ერთ-ერთმა ყველაზე გავლენიანმა კინოხელოვანმა განაცხადა, რომ წლების წინ საკუთარ თავს პირობა მისცა, თუ წარმატებული გახდებოდა, დედამისისთვის "პენიც" კი არ მიეცა.

და, მისი თქმით, ბავშვობაში დედამისის მხრიდან გამოვლენილი სიმკაცრის გამო ეს პირობა შეასრულა კიდეც.

ამ განცხადებას ურთიერთსაწინააღმდეგო შეფასებები და დიდი განხილვები მოჰყვა, რასაც თავად რეჟისორის დედა, კონიც გამოეხმაურა.

"მხარს ვუჭერ, ვამაყობ მისით და მიყვარს ჩემი ვაჟი, კვენტინი და მისი ოჯახი. უდიდესი სიხარული მომანიჭა მის ქორწილში ცეკვამ და ჩემი შვილიშვილის, ლეოს, დაბადების ამბავმა", — განაცხადა მან.

USA Today-ის ცნობით, ტარანტინოს დედამ ისიც აღნიშნა, რომ მისი შვილის განცხადებები "კონტექსტის გარეშე აიტაცეს" და მას არ სურს, რომ მონაწილეობა მიიღოს ამ "ვულგარულ მედია აჟიოტაჟში".

ახალგაზრდა ტარანტინო დედასთან ერთად.

პოდკასტში საუბრისას კვენტინ ტარანტინომ გაიხსენა, რომ როცა სკოლაში სცენარების წერას ცდილობდა, მას დედამისი მხარს არ უჭერდა, კიცხავდა და მის გატაცებას სარკასტულად უყურებდა:

"მან მისაყვედურა და თავისი პატარა ტირადისას მითხრა: 'და ეს შენი ვითომ "მწერლის კარიერა", რის მიღწევასაც ცდილობ, უნდა დასრულდეს'. თან ამას შესაბამისი ირონიული ჟესტიკულაციით მეუბნებოდა. იმას გულისხმობდა, რომ სკოლაში სხვა რამე არ უნდა მეკეთებინა, გარდა სასწავლო პროცესში ჩართულობისა".

ამის გამო მომავალმა რეჟისორმა პირობა დადო, რომ წარმატებას როცა მიაღწევდა, დედისთვის ფინანსური სარგებელი არ გაეზიარებინა:

"როცა მან ეს ყველაფერი ასე სარკასტულად მითხრა, გავიფიქრე: 'კარგი, ქალბატონო, როცა წარმატებული მწერალი გავხდები, ერთ პენსაც ვერ მიიღებ ჩემი წარმატებული კარიერიდან. არ გიყიდი სახლს. არ გაგიშვებ დასასვენებლად. არ გაჩუქებ კადილაკს, დედიკო. ვერაფერს მიიღებ, რადგან ეგ სიტყვები მითხარი".