კვენტინ ტარანტინოს ერთგულმა ფანებმა კარგად იციან, თუ როგორ უყვარს თანამედროვეობის ამ ერთ-ერთ ყველაზე დიდებულ რეჟისორს პოდკასტები და ცოტა ხნის წინაც ერთ-ერთ ასეთ გადაცემაში სტუმრობისას თავის ბავშვობის გამოცდილებაზე ისაუბრა.

უფრო კონკრეტულად, ტარანტინომ გაიხსენა, რომ სკოლაში ხშირად ცდილობდა სცენარების წერას, რასაც მასწავლებლები "ამბოხად" აღიქვამდნენ, რის გამოც დედამისს დაუკავშირდნენ, რომელმაც ასევე არ დაუჭირა მხარი თავის ვაჟს.

"მან მისაყვედურა და თავისი პატარა ტირადისას მითხრა: 'და ეს შენი ვითომ "მწერლის კარიერა", რის მიღწევასაც ცდილობ, უნდა დასრულდეს'. თან ამას შესაბამისი ირონიული ჟესტიკულაციით მეუბნებოდა. იმას გულისხმობდა, რომ სკოლაში სხვა რამე არ უნდა მეკეთებინა, გარდა სასწავლო პროცესში ჩართულობისა", — გაიხსენა რეჟისორმა.

როგორც თვითონ ამბობს, სწორედ ამ შემთხვევის გამო საკუთარ თავს შემდეგი პირობა მისცა:

"როცა მან ეს ყველაფერი ასე სარკასტულად მითხრა, გავიფიქრე: 'კარგი, ქალბატონო, როცა წარმატებული მწერალი გავხდები, ერთ პენსაც ვერ მიიღებ ჩემი წარმატებული კარიერიდან. არ გიყიდი სახლს. არ გაგიშვებ დასასვენებლად. არ გაჩუქებ კადილაკს, დედიკო. ვერაფერს მიიღებ, რადგან ეგ სიტყვები მითხარი".

პოდკასტის წამყვანმა გადაამოწმა, შეასრულა თუ არა ტარანტინომ თავისი სიტყვები და მან მიუგო, რომ კი, ზუსტად ასე მოიქცა.

"შვილებთან ურთიერთობისას ყოველ სიტყვას შესაბამისი შედეგი მოჰყვება. უნდა გახსოვდეს, რომ სარკასტულმა ტონმა დიდი გავლენა შეიძლება იქონიოს მათზე და შესაბამისადაც მოიმკი შემდეგ შედეგს", — აღნიშნა მან.