60-ზე მეტი ქვეყნის საერთო განცხადებით, ავღანელებსა და სხვა ქვეყნების მოქალაქეების ავღანეთის უსაფრთხოდ დატოვების შესაძლებლობა უნდა მიეცეთ.

"უსაფრთხოების გაუარესებული სიტუაციის გათვალისწინებით, ჩვენ მხარს ვუჭერთ, ვმუშაობთ უსაფრთხოების უზრუნველყოფისთვის და მოვუწოდებთ ყველა მხარეს, რომ პატივი სცეს და ხელი შეუწყოს სხვა ქვეყნისა და ავღანეთის იმ მოქალაქეების უსაფრთხო გამგზავრებას, ვისაც წასვლა სურს. ძალაუფლების მქონე პირებს ეკისრებათ პასუხისმგებლობა ადამიანის სიცოცხლის, ქონების დაცვის, უსაფრთხოების და სამოქალაქო წესრიგის დაუყოვნებლივ აღდგენაზე.

ავღანელებმა და საერთაშორისო მოქალაქეებმა, ვისაც სურს ქვეყნის დატოვება, ამის გაკეთების უფლება უნდა მიეცეთ, გზები, აეროპორტები ღია უნდა იყოს, სიმშვიდე უნდა შენარჩუნდეს.

ავღანელი ხალხი იმსახურებს უსაფრთხოდ, დაცულად და ღირსეულად ცხოვრებას, ჩვენ საერთაშორისო თანამეგობრობაში მზად ვართ, რომ მათ დავეხმაროთ", — ნათქვამია განცხადებაში.

განცხადებას ხელს 60-ზე მეტი ქვეყანა აწერს, რომელთა შორის არის ავსტრია, ბელგია, კანადა, ჩილე, საქართველო, ესპანეთი, სლოვენია და სხვა.

მას შემდეგ, რაც თალიბანი ქაბულში შევიდა, ათასობით ავღანეთის მოქალაქე აეროპორტში შეიკრიბა ისინი ქვეყნის დატოვებას ცდილობენ და თვითმფრინავში ასვლა სურთ. მედია დაღუპულთა შესახებ მოწმეებზე დაყრდნობით წერს და აცხადებს, რომ ოფიციალური კომენტარი აშშ-ს ჯერ არ გაუკეთებია.

აღსანიშნავია, რომ თალიბანის ქაბულში შესვლის შემდეგ, პრეზიდენტმა ქვეყნა დატოვა, ხოლო საელჩოებმა ევაკუაცია დაიწყეს. ამ ეტაპზე, ქაბულის აეროპორტის უსაფრთხოებას ამერიკის სამხედრო ძალები იცავენ და მოქალაქეები, ასევე, დიპლომატები საჰაერო გზით ქვეყნიდან გაჰყავთ.

თალიბანის მეომრები ავღანეთის დედაქალაქ ქაბულში 15 აგვისტოს შევიდნენ. ეს ბოლო ყველაზე დიდი და მნიშვნელოვანი ქალაქი იყო, რომელიც თალიბანი არ აკონტროლებდა. არსებული ინფორმაციით, თალიბანს ქალაქი არ აუღია და მის შემოგარენში არიან განლაგებული, თუმცა რამდენიმე რეგიონში მეომრები უკვე შევიდნენ.

The Guardian-ის ინფორმაციით, თალიბანის პრესსპიკერმა განაცხადა, რომ არ აპირებენ "სამაგიერო გადაუხადონ" არავის, მათ შორის მათ, ვინც ავღანეთის ხელისუფლებაში მუშაობდა. თუმცა, როგორც AP წერს, საჯარო მოხელები შიშით ტოვებენ დაწესებულებებს. Aljazeera-ს ინფორმაციით, თალიბანმა განცხადება გაავრცელა, სადაც აღნიშნულია, რომ ქალაქის ძალით აღებას არ აპირებენ და მიმდინარეობს მოლაპარაკებები, რომ "გარდამავალი პროცესი უსაფრთხოდ დასრულდეს".

ავღანეთში ძალადობა მას შემდეგ გაიზარდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, დასრულდება.