აუდიტის სამსახურის მონაცემებით, მიმდინარე წლის 1-10 აგვისტოს შუალედში პარტიებს სულ 3 003 570 ლარი შესწირეს, საიდანაც 2 948 000 ლარი, ანუ მთლიანი შემოწირულობების 98% ქართულმა ოცნებამ მიიღო.

ამ პერიოდში შემოწირულობის მიმღებებს შორის, გარდა ქართული ოცნებისა, კიდევ ოთხი პარტიაა: ევროპული საქართველო, ენმ, საქართველოსთვის (გახარიას პარტია) და პარტია თავისუფალი საქართველო. ყველა ამ ჩამოთვლილმა პოლიტიკურმა სუბიექტმა ჯამში 55 570 ლარის შემოწირულობა მიიღო.

ასეთია იმ პარტიების ჩამონათვალი, რომლებმაც მიმდინარე წლის 1-10 აგვისტოს პერიოდში შემოწირულობები მიიღეს:

• ქართული ოცნება-დემოკრატიული საქართველო — 2 948 000 ლარი;
• ევროპული საქართველო-მოძრაობა თავისუფლებისთვის — 25 000 ლარი;
• ერთიანი ნაციონალური მოძრაობა — 22 280 ლარი;
• საქართველოსთვის — 6 290 ლარი;
• თავისუფალი საქართველო — 2 000 ლარი.

აგვისტოს პირველ ათ დღეში ქართული ოცნების შემომწირველებს შორის 4 იურიდიული და 137 ფიზიკური პირია. ამავე პერიოდში ევროპულ საქართველოს — 3, ენმ-ს — 5, გახარიას პარტიას (საქართველოსთვის) — 4, ხოლო პარტია თავისუფალ საქართველოს 1 შემომწირველი ჰყავდა. აღსანიშნავია, რომ თავისუფალი საქართველოსთვის გადაცემული 2 000 ლარის ღირებულების შემოწირულობა არაფულადი სახის იყო

საერთაშორისო გამჭვირვალობა საქართველოს პორტალის, ტენდერების მონიტორინგის მიხედვით, ქართული ოცნების ოთხი შემომწირველი იურიდიული პირიდან სამს, სხვადასხვა დროს, სახელმწიფო ტენდერებში აქვს მონაწილეობა მიღებული. ამასთან, ისინი გამარტივებული შესყიდვის კონტრაქტებითაც სარგებლობდნენ.

• შპს მშენებელი — აგვისტოს პირველ ათ დღეში ამ კომპანიამ ქართულ ოცნებას 15 000 ლარი შესწირა. როგორც ტენდერების მონიტორინგიდან ირკვევა, ამ კომპანიას სულ 130 სატენდერო კონკურსში აქვს მონაწილეობა მიღებული. მოგებული ტენდერებიდან მან 6 511 138 ლარის შემოსავალი მიიღო. ამასთან, შპს მშენებელს, სხვადასხვა დროს, 17 გამარტივებული შესყიდვის კონტრაქტი აქვს დადებული, რომელთა ხელშეკრულებების საერთო ღირებულება 137 477 ლარი იყო;
• შპს მშენებელი 2012 — ამ კომპანიამაც ქართულ ოცნებას 15 000 ლარი შესწირა. მას 67 ტენდერში აქვს მონაწილეობა მიიღებული. მოგებული ტენდერებიდან მან 7 742 951 ლარი მიიღო. ასევე, ამ კომპანიასთან დადებულია 29 გამარტივებული შესყიდვის ხელშეკრულება, რომელთა ჯამური ღირებულება 193 732 ლარი იყო;
• შპს მშენ - 2008 — სხვა კომპანიების მსგავსად ამ ფირმამაც 15 000 ლარი შესწირა მმართველ პარტიას. მასთან გამარტივებული შესყიდვის 6 ხელშეკრულებაა დადებული, საიდანაც კომპანიამ 5 108 ლარის შესმოსავალი მიიღო.

პარტიებში შემოწირულობების მიღების პროცესი ბოლო თვეების განმავლობაში გააქტიურდა, რაც მიმდინარე წინასაარჩევნო კამპანიას უკავშირდება. მაისიდან ივლისის ჩათვლით პოლიტიკურ სუბიექტებს სულ 571 000 ლარის შემოწირულობა ჰქონდათ მიღებული, საიდანაც 78% ორი პარტიის, ქართული ოცნებისა და პარტია საქართველოსთვის დასაფინანსებლად იყო მიმართული.