ეკონომიკისა და მდგრადი განვითარების მინისტრის, ნათია თურნავას განცხადებით, მობილობის შეზღუდვა არ განიხილება. ის ამბობს, რომ ამ ეტაპზე დღის წესრიგში დგას უკვე არსებული აკრძალვების აღსრულება და არა ახალი რეგულაციების შემოღება.

"ჩვენ გავამკაცრებთ არსებული აკრძალვების აღსრულებას იმიტომ, რომ შეიძლება ზაფხულის დადგომასთან ერთად საზოგადოება მოეშვა უფრო მეტად. ჩვენც მეტი ლმობიერება გამოვიჩინეთ, ალბათ. ახლა, რა თქმა უნდა, ეს გამკაცრდება [...] მაგრამ, არ განიხილება ჩაკეტვა დარგების, არ განიხილება მობილობის შეზღუდვა", — განაცხადა ნათია თურნავამ რუსთავი 2-ის ეთერში.

ნათია თურნავა ამბობს, რომ ქვეყანა აღარ დგას იმ დილემის წინაშე, რომ ეკონომიკური განვითარების შესაძლებლობა პანდემიასთან ბრძოლას "შესწიროს".

ეკონომიკის მინისტრისგან განსხვავებით, უფრო პესიმისტური პათოსი ჰქონდა დღეს ჯანდაცვის მინისტრს, ეკატერინე ტიკარაძემ განაცხადა, რომ დღესდღეობით ჩვენ გვაქვს ეპიდემიის ყველაზე ცუდი სცენარით მიმდინარეობა. აღსანიშნავია, რომ დღეს განსაკუთრებით მაღალი იყო ინფიცირებისა და გარდაცვალების მაჩვენებელი — 10 აგვისტოს მონაცემებით კორონავირუსის 5 697 ახალი შემთხვევა დადასტურდა, ხოლო გარდაიცვალა — 54 ადამიანი. ამ ფონზე, ეკატერინე ტიკარაძე აცხადებს, რომ ჯანდაცვის სისტემა არ არის ყოვლისშემძლე და ეპიდვითარება მნიშვნელოვნადაა დამოკიდებული მოსახლეობის პასუხისმგებლობაზე.

გაიგე მეტი: