Covid-19-ით გარდაცვლილი მომღერლის, თემურ წიკლაურის ხსოვნის პატივსაცემად, კულტურის სამინისტრო თელავის თეატრში ხალხმრავალ ღონისძიებას გამართავს. თელავის თეატრში On.ge-ს განუცხადეს, რომ თელავის მერიამ მათგან მხოლოდ დარბაზი დაჯავშნა. როგორც თელავის თეატრის წარმომადგენელმა გვითხრა, დღეს საღამოს 350 სტუმარს ელოდებიან.

აღნიშნულთან დაკავშირებით კულტურის სამინისტროსაც დავუკავშირდით, თუმცა სამინისტროს პრესსამსახური ჩვენს ზარებს ამ დრომდე არ პასუხობს. კულტურის სამინისტროდან პასუხის მიღებისთანავე მასალას განვაახლებთ.

კორონავირუსით გამოწვეული გართულებების შედეგად თემურ წიკლაური პირველ თებერვალს გარდაიცვალა.

საქართველოში ბოლო დღეების განმავლობაში მძიმე ეპიდემიოლოგიური ვითარებაა. 10 აგვისტოს მონაცემებით, ქვეყანაში კორონავირუსის 5 697 ახალი შემთხვევა დადასტურდა, გამოჯანმრთელდა 2 713, ხოლო გარდაიცვალა — 54 ადამიანი.

თეა წულუკიანი არ არის პირველი მთავრობის წარმომადგენლებიდან, რომელიც კორონავიურისის გავრცელების პრევენციისთვის დაწესებულ რეგულაციებს არ იცავს.

რთული ეპიდემიოლოგიური ვითარების ფონზე, 7 აგვისტოს ქვეყნის პრემიერმინისტრმა, ირაკლი ღარიბაშვილმა ხალხმრავალ სუფრაზე იქეიფა. სოციალურ ქსელში გავრცელებულ ვიდეოებში ჩანს, რომ სივრცეში არ იყო დაცული სოციალური დისტანცია, შეკრებილები იყვნენ პირბადის გარეშე და ირღვეოდა სხვა რეკომენდაციებიც. ვიდეო სავარაუდოდ კახეთში, სოფელ არხილოსკალოშია გადაღებული, სადაც ღარიბაშვილი ოლიმპიური ჩემპიონის, ლაშა ბექაურის დახვედრის ცერემონიას დაესწრო.

ქვეყანაში ეპიდემიოლოგიური მდგომარეობა სულ უფრო და უფრო მძიმდება. ინფიცირების ყოველდღიური მაჩვენებელი ბოლო პერიოდში 5 ათასს აჭარბებს. ამ ეტაპზე საქართველოში კორონავირუსის მეოთხე ტალღაა და სწორედ დღეს, ჯანდაცვის მინისტრის მოადგილემ, თამარ გაბუნიამ განაცხადა, რომ პიკის დაღმასვლა ჯერ არ შეინიშნება. ამ ფონზე საკოორდინაციო საბჭო, რომელსაც თავად პრემიერმინისტრი, ირაკლი ღარიბაშვილი ხელმძღვანელობს, მუდმივად მოუწოდებს მოსახლეობას რეკომენდაციების დაცვისკენ, რაც სოციალურ დისტანციას და ხალხმრავალი შეკრებებისგან თავის არიდებას გულისხმობს. უფრო მეტიც, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ განაცხადა, რომ განიხილება დიდი თავშეყრების აკრძალვაც.

აღსანიშნავია ისიც, რომ მაშინ, როცა პრემიერმინისტმა არაერთხელ მოუწოდა მოსახლეობას ვაქცინაციის პროცესში ჩართვისკენ, ის მხოლოდ გუშინ, 8 აგვისტოს, ხალხმრავალ ქეიფში მონაწილეობის შემდეგ აიცრა.

გაიგე მეტი: